ORANJESTAD- Dialuna den oranan di atardi Minister di Deporte Richard Visser a asisti na e groundbreaking riba e veld caminda cu porfin e stadion di lifida lo bay bin, na unda e hobennan di e bario y becindario porfin ta bai haya un stadion cu tanto nan a anhela pa por practica nan deporte favorito riba dje, esta e deporte rey di futbol.
Mester remarca si cu e stadion aki lo bira un fasilidad deportivo netamente pa Lifida y cu tur team cu ta resorta bou di Lifida por hasi uso di esaki. Despues di hopi añanan cu señor Buchi Panama a boga pa bin cu un stadion especialmente pa Lifida, dialuna atardi porfin Buchi Panama por a mira cu su propio wowonan, e prome paso pa cu esaki bira realidad ora cu e groundbreaking a wordo efectua den presencia di Minister Visser, un persona cu semper den su bida tawata un atleta y cu tin deporte masha cerca di su curason. Tabata reina un ambiente di alegria y satisfaccion dialuna atardi cerca e dirigentenan di futbol pa e paso importante aki tuma. Buchi Panama, un persona cu un curason grandi pa e deporte rey, especialmente pa esnan den Lifida y cu pa añanan largo a dedica su bida na e deporte rey, tabata presente na e ocacion aki y a expresa su sentimentonan di alegria profundo, cu dentro di poco e por mira tur mucha deportista hunga futbol riba e veld den e stadion di Lifida na Jara. Cu esaki tambe minister Visser ta manda palabra di felisitacion na Lifida engeneral.