ORANJESTAD/NEW YORK – Den un esfuerso pa por estrecha nos relacionnan y hasta sera amistadnan nobo den prensa di Merca, a dicidi di organisa un almuerso cu un grupo grandi di periodistanan for di Merca. E evento a tuma lugar na New York na unda Minister di Turismo Otmar Oduber tabata presente hunto cu e directiva nobo di ATA Aruba pa haci un presentacion.
E reaccion di e periodistanan tabata sumamente positivo y Aruba por conta cu amistadnan nobo awor den prensa di Merca, cla pa sigui duna Aruba mas cobertura posibel.

Durante e presentacion di Minister Otmar Oduber, el a splica e periodistanan presente di e cambionan cu e Gobierno nobo ta haciendo na Aruba, por ehempel den embeyecimiento di centro di ciudad. Tambe a conta di e cantidad di productonan nobo cu Aruba tin pa ofrece su turistanan y sin lubida e lista di actividadnan spectacular cu nos isla lo ta anfrition di dje den e lunanan nos dilanti, manera ta e festival internacional di pelicula.

For di sala por a sinta un animo grandi entre e periodistanan cu a tende cantidad di informacion di Aruba cu nan no tabata conoce mes, manera ta e esfuersonan cu nos isla ta haci pa eco-tourism den cuadro di nos Parke Nacional Arikok. Representantenan di M-Silver Associates cu ta e compania di relacionnan publico cu ta representa Aruba na Merca y Canada, a duna di conoce cu e medionan di comunicacion cu a wordo invita y cu a presenta ta e mihornan den e mercado elite di Merca. Ela referi na cantida di revista, corant y varios otro medio mas. Pa logra haya e periodistanan aki pa bin topa cu bo no ta facil y e hecho cu nan a bin ya ta mustra e interes cu nan tin den nos isla.

Minister Otmar Oduber a bisa e presentenan na final cu “Tin 90 mil amigo ta spera boso na Aruba”, referiendo na e campanja publicitario nobo cu Aruba a lansa internacionalmente algun tempo atras, haciendo enfasis cu tur hende di Aruba ta amigo di nos turistanan, dunando nos huespednan un sentido cu nan ta na cas ora nan ta na Aruba.
Separa di miembronan di prensa y invitadonan, tambe tabata presente Joyeline Croes, Minister Plenipotenciario di Aruba na Merca cu tambe a presencia e presentacion y a bisa na final cu ta den e direccion aki nos isla mester sigui bay, organisando mas di e eventonan aki pa por sigui haya cobertura den prensa di Merca