ORANJESTAD/NEW YORK -Recientemente e compania Noble Kommunikation na Alemania a gana e premio di mihor agencia di publicidad pa aspectonan di turismo na Alemania. Siendo e compania aki esun responsabel pa nos promocion y publicidad na Alemania, Minister Otmar Oduber a felicitanan pa nan premio. Obviamente e forma cu nan ta promociona Aruba tambe a duna un aporte pa nan por a gana dicho premio. Anett Wiegand di e compania a bisa cu den tur e periodistanan di Alemania nan a scohe nan como e mihor agencia di publicidad pa e forma unico cu nan ta trata medionan di comunicacion, e forma con nan ta organisa conferencianan di prensa, accesibilidad na prensa, etc. Gobierno di Aruba a expresa na nan di ta masha contento y satisfecho cu nan ta trabao pa e oficina di mercadeo di ATA Europe pa e mercado Aleman.