ORANJESTAD, Aruba – 1 di maart 2010: E dos presentadornan Kathy Lee y Hoda di “The Today Show” na NBC a keda masha encanta cu e bailarinanan di “The Super Dancers” di Aruba. Hunto cu un delegacion di Aruba, encabesa pa Minister di Turismo sr. Otmar Oduber, a haci un esfuerso pa promove nos isla como destinacion turistico. E grupo di Aruba tabata invita den studio di NBC den Rockefeller Center pa haci un aparicion, bisti den trahenan carnavalesco. Ambos presentadora a bisti un “head piece” y asina a drenta den e ambiente di carnaval di Aruba.

Minister Otmar Oduber a combersa cu e presentadornan riba nos isla como destinacion turistico y posibilidadnan pa bishita Aruba. Den esaki a recorda e pueblo Mericano cu tin 13 gateway pa jega Aruba, di cual for di New York y Boston tin buelonan diario y directo pa nos isla. Cu esaki e opcionnan pa bini Aruba for di Merca ta multiple.

E partinan aki di Merca na e momentonan aki ta masha frieuw y como tal, tipo di promocionnan asina ta cay den masha bon tera. Mayoria hende den e region aki di Merca ta buscando forma pa core pa e frieuw y busca calor y den esaki Aruba definitivamente ta un di e mihor opcion.

E segmento di Aruba tabata pa algo mas cu 2 minuut y den e espacio ey a entrevista Minister Otmar Oduber y tambe a entrevista Francie Croes di “The Super Dancers” riba e trahenan carnavalesco cu a bisti pa e presentacion. Ambos a splica di e ambiente di carnaval cu Aruba a caba di pasa aden y di e amabilidad cu Aruba ta cla pa ofrece na turistanan for di Merca.

E bishita aki ta den cuadro di un reunion cu Minister Otmar Oduber tin cu tur e directornan regional, Agencianan di PR y promocion pa Aruba, na unda lo presenta su vision y plannan pa turismo di Aruba den e siguiente 4 añanan. E reunion aki ta tuma lugar diamars awor na New York cu invitadonan for di varios parti di Merca, Europa, Latino y Centro America.