Categorized | Arte, Cultura, Economia, Social Turismo

Kioskonan den waf cla pa wordo otorga na artista y artesanonan local cu productonan di nos isla

Posted on 13 October 2011 by admin

ORANJESTAD Minister Otmar Oduber for di momento cu el a asumi responsabilidad ministerial a mustra claramente su interes y intencion pa mehora calidad di Producto Aruba. Parti di esaki ta encera duna realce na nos parti cultural y haci’e parti di e experiencia di nos bishitantenan.
Asina el a bin cu diferente cambionan den e area di waf, haciendo di e experiencia di specialmente e turistanan crucero uno mas agradabel unda cu a drecha y reorganiza tur e kioskonan den e area y tambe regula e sistema di tour bus. Di e forma aki ta mustrando nos bishitantenan e cultura di amabilidad y cordialidad cu ta caracteriza nos pueblo, den un ambiente agradabel pa tanto local como turista.
Banda di esaki, Minister Oduber a bin tambe cu Carubbian Festival na San Nicolas, un festival cu siman pa siman ta birando mas y mas un exito. Tur diahuebs turista ta mengle cu local y ta haya un sabor di loke nos cultura, artesania, cushina, historia y custumbernan ta.
Den e mesun cuadro aki, awor a yega turno na e kioskonan den waf caminda cu nan a wordo renova, hayando un toke tipico. Idea tras di e renovacion aki ta pa artista y artesanonan local por bin na remarke pa haya uno pa uso comercial y bende nan productonan na nos bishitantenan crucero.
Pa pone enfasis riba e parti di nos propio cultura, Minister Otmar Oduber a stipula cu tur esnan cu lo desea di bin na remarke pa haya un di e kioskonan mester tin nacionalidad Hulandes, mester ta registra na Camara di Comercio, y e productonan cu lo wordo bendi mester ta traha na Aruba mes y ademas wordo considera como producto local.
Tur artista y artesano cu ta desea di bin na remarke pa haya un kiosko riba tereno di waf por inscribi te cu dialuna 17 di october, 2011 5’or di atardi. Nan mester manda un e-mail cu nan nomber y number di telefon na s.lee@aruba.com of yama 582-4900 ext. 117 y tuma contacto cu Sue-Ann Lee na Ministerio di Turismo, Transporte y Labor.
Tur esnan cu inscribi cu ta cumpli cu e requisitonan lo wordo yama pa haci un presentacion di nan productonan durante Carubbian Festival caminda cu lo elegi esnan cu lo haya un kiosko.
Minister Otmar Oduber ta sumamente satisfecho di e resultadonan di e trabounan haci te na e momentonan aki caminda cu e respuesta di nos bishitantenan como tambe di localnan tabata uno hopi positivo, mirando cu ta realzando nos cultura den diferente aspecto y hiband’e mas serca di nos turistanan.

Leave a Reply

Advertise Here
Advertise Here