Categorized | Arte, Cultura, Social Turismo

“After Party”porfin na Aruba

Posted on 27 September 2011 by admin

ORANJESTAD -E aña aki lo celebra dia internacional di “The Golden Age(r)s”, dia 1 di oktober, na un manera espectacular, pasobra “After Party” lo ta na Aruba.

“After Party” ta un obra teatral humoristico cu ya caba a ser presenta na Hulanda, Corsow y Boneiro y cu a haya masha bon acogida. Por wak you tube pa haya un sabor di locual por spera y pa bo ta bon prepara.

E ta un obra pa henter comunidad di Aruba pero en particular pa “The Golden Age(r)s”. Ta trata di e storia di cinco “Golden Girls” cu a dicidi di bay biba hunto den un cas. Nan ta celebra e “After Party” di nan bida, caminda nan ta wak bek y evalua na un manera humoristico acontecimento- y recuerdonan di nan bida. Bisiñanan di e cinco hende muhenan aki ta tres hende homber, e salo den e “After Party”.

“After Party” ta un produccion di Teatro Luna Blou y ta wordo interpreta pa actornan sumamente talentoso for di Corsow. Nan ta Rina Penso, Greta Trapenberg, Anne-Marie Braafheid, Mila Palm, Jenny Fraai, Eric van Ommeren, Gerry Raphaela, y Uthsel Victoria. Regisora ta Jackie Bernabela (AruBon). Texto a wordo scirbi pa Albert Schoobar y Jackie Bernabela. Conhuntamente cu Diana Domacassé-Lebacs y Rigoberto Samson nan ta forma e team completo cu lo bin pa deleita henter Aruba cu nan presentacion.

Presentacion di “After Party” na Aruba lo ta dia 1 di oktober, pa 4or di atardi na Scol di Arte na San Nicolas y dia 2 di October pa 4or di atardi e lo tuma luga na Cas di Cultura. Entrada ta Awg 25,- pa persona.

Philomena Wong ta e persona cu a bin cu e tremendo idea pa trece “After Party” pa Aruba. Conhuntamente cu diferente otro persona y instancia (entre otro Club Kibrahacha 60+, Mi Cutisa y Stimaruba) ta trahando duro pa tur hende por gosa y pasa un atardi dushi, sumamente alegre y placentero.

E proyecto aki ta ser financia pa UNOCA. Tremendo cooperacion tambe a wordo ricibi for di CEDE Aruba, Teatro Luna Blou di Corsou y diferente otro persona y instancia.

Ticketnan ta obtenibel na Club Kibrahacha 60+, UNOCA of Scol di Arte na San Nicolas.

Leave a Reply

Advertise Here
Advertise Here