ORANJESTAD -Dialuna mainta Minister Otmar Oduber tabatin un conferencia di prensa caminda el a elabora entre otro riba su biahe di siman pasa pa Venezuela, cual por wordo evalua como uno positivo.
El a indica cu e tabata 2 dia na Venezuela caminda cu a haya e grato noticia cu na e pais bisiña na nivel nacional Aruba a logra gana e premio pa e mihor campaña di branding caminda cu a competi cu entre otro American Airlines y otro companianan grandi.
Papiando riba esaki e mandatario a duna di conoce cu pa mas o menos 3 aña no tabata haci mas propaganda na Venezuela, sino solamente relacionnan publico. Na momento cu Gabinete Mike Eman a asumi poder, bou maneho di Minister Oduber a cambia esaki y awor cu e logo nobo di Aruba, a logra di gana e premio aki cu a pone nos isla na un nivel sumamente positivo na Venezuela.
Banda di esaki, diabierna Minister Otmar Oduber a reuni cu e tour operators y aerolineanan caminda a papia riba e tema cu den e promer 6 lunanan di 2011 Aruba a aumenta cu 42% den e cantidad di turistanan for di Venezuela. Specialmente a papia riba luna di juni, cual tradicionalmente ta uno basta abou, caminda a surpasa 47% di aumento. “Kiermen e maneho y mercadeo cu a tuma lugar na Venezuela tabata sumamente positivo. Cu esaki mi kier a felicita oficina di turismo na Venezuela y tambe esun di Aruba pa un trabou estupendo realiza”.
El a agrega cu den e sala completamente yen di diabierna por a sinti for di nos partnernan un satisfaccion grandi pa e relacion cu tin na e momentonan aki cu oficina di turismo, pero tambe cu e maneho y vision cu tin pa cu e mercado Venezolano, cu ta nos di dos mercado mas grandi.
Tambe e titular di Turismo, Transporte y Labor a reuni cu embahada Hulandes pa agiliza diferente proyecto cu tin, a conversa cu esnan di aeronautica civil mirando cu Insel Air Aruba pa final di augustus lo inicia su vuelonan for di Aruba pa Venezuela; aki den cuadro di e bon relacion cu tin a conversa pa evita entre otro e problema cu Corsow a enfrenta, esta di cancela e vuelonan di Insel.
Algo sigur hopi positivo ta cu a haya hopi cobertura di prensa Venezolano, esaki principalmente teniendo na cuenta cu Aruba ta ocupa e di tres posicion di mercadonan cu e demanda mas halto na nivel nacional, despues di Merca y Spaña. Esaki despues cu na momento cu Minister Oduber a asumi e responsabilidad ministerial, nos isla tabata na di 8-9 lugar.