Categorized | Gobernacion Aruba, Turismo

Encuentro fructifero entre Minister Otmar Oduber y trahadornan di Paradise Beach Villas

Posted on 22 June 2011 by admin

ORANJESTAD -Diamars mainta Minister Otmar Oduber a continua cu su encuentronan cu trahadornan di diferente hotelnan di nos isla pa comparti cu nan e ultimo desaroyonan di turismo y di biaha haya nan feed back. Ademas di esaki ta probechando e ocasion pa realiza un encuesta como parti di e master plan strategico di turismo cu lo mester keda cla na final di november. Intencion ta pa involucra comunidad en general den dje, pa haya sa nan opinion riba con nan kier mira nos turismo den e proximo añanan. Den e caso aki ta acercando e trahadornan di hotel pa haya nan comentario mirando cu nan ta e personanan cu diariamente tin contacto directo cu turistanan.
Diamars mainta a bishita e trahadornan di Paradise Beach Villas. Despues di e presentacion di Minister Oduber a bin diferente pregunta, comentario y sugerencia dilanti relaciona cu e industria importante aki, lo cual a demostra e interes grandi cu e trahadornan aki tin pa cu nos turismo.
Papiando cu Alexander Krozendijk, manager di Gousekeeping, el a bisa cu e acercamento di Minister Otmar Oduber pa cu e trahadornan di hotel ta hopi bon, e ta spera cu e lo sigui asina, esta di informa e trahadornan. Esaki pasobra ta hopi importante pa e trahadornan sa kico ta pasando. E ta bisa cu hopi biaha bo ta tende di dje den medionan di comunicacion, pero ta haya hopi version straño di dje.
Pa Alexander loke a resalta mas di e presentacion di Minister di Turismo ta e parti di e repeat visitors, situacion di nos beachnan y specialmente e programa di certificacion cu lo cuminsa otro luna.
E programa aki ta specialmente dedica pa tur persona cu ta labora den sector turistico lo enfoca hopi riba nos cultura, historia, lugarnan di atraccion y idiomanan, es decir, e ta diseña pa upgrade e conocemento di esnan laborando den e sector aki pa por ofrece un mihor servicio na nos bishitantenan. Alexander Krozendijk ta considera cu e programa aki mester wordo mantene pa tur hende haya sa kico pa haci y bisa.
Mester bisa cu gerencia di hotel a mustra nan aprecio na Minister Otmar Oduber y a haci entrega di un bunita regalo na su persona. Un polo shirt cu e logo di Paradise Beach Villas riba dje. E mandatario a keda hopi contento cu e regalo aki. Diahuebs e bishita di minister na e trahadornan di hotel lo continua.

Leave a Reply

Advertise Here
Advertise Here