SAN NICOLAS -Diahuebs siman pasa a tuma lugar e promer anochi di Carubbian Festival na San Nicolas, y e multitud presente, tanto turista como local a cataloga e anochi aki como un exito. Grandi y chikito por a goza un mundo di tur loke e festival aki tabatin pa ofrece, caminda a predomina, manera e nomber mes ta bisa, e ambiente unico di Caribe cu por a wordo haya completamente na San Nicolas.
Minister Otmar Oduber a indica cu e evento aki a yene cu hopi emocion, pasobra ora a inicia cu e proyecto aki el a haya hopi elogio, pero tambe masha hopi critica y duda, pero e diahuebs a nochi a keda demostra cu e proyecto aki pa San Nicolas a logra.
Papiando cu hendenan di San Nicolas mes, nan a expresa cu nan a lubida con bunita nan Main Street ta y cu e anochi ey nan a recorda su buniteza. E mandatario a gradici e cooperacion di e comerciantenan, el a bisa cu na cuminsamento e la bay un poco stroef, pero despues nan tur a cuminsa wak con bunita e edifcionan tabata keda y nan mes a bay over na verf esun di nan.
E idea no tabata pa Carubbian Festival bira djis un evento solamente pa pueblo di Aruba, pero pa atrae turistanan bin conoce nos cultura, pa nan conoce San Nicolas, e Sunrise City unda cu por topa cultura di Aruba den un forma Caribense.
A reuni durante 7 luna largo pa por a yega na e producto cu a lanza diahuebs pasa. Asina e mandatario a gradici cooperacion di Minister di Cultura, Instituto di Cultura, Minister Mike de Meza y henter Carubbian Foundation. “Awe ta e inicio di un proceso nobo y fresco pa pueblo di San Nicolas”.
“Awe nochi mi ta feliz di mira c un soño cu mi tabatin for di mas cu dos aña pasa, den eleccion nos a bisa nos ta bin cune, hopi hende a duda y awe nochi e ta poni riba pia. Mas di 4 bus di turista cu a yega awe pa e promer edicion, gradiciendo De Palm Tours y otronan cu a promociona esaki, y comunidad di Aruba cu ta hopi importante cu a responde grandemente y a ‘mingle’ cu e turista”, Minister Otmar Oduber a duna di conoce.
Mas aleu Minister di Turismo, Transporte y Labor a comenta cu nos tur ta conciente cu San Nicolas mester di un push, cu esaki no ta tarea solamente di Gobierno, di Otmar of Mike de Meza, e ta un tarea di nos tur y nos tur hunto mester pone schouder bou di e proyecto aki.
Na mes momento el a bisa cu mirando e exito di e anochi caminda cu a logra e meta principal di trese turista pa e parti pariba di nos isla, laganan conoce e parti aki, e ta convenci cu nan mes lo cuminsa papia riba dje, e famoso ‘word of mouth’. Tambe awor por pone riba e webpage e testimonials di esnan cu tabata presente y asina e lo cuminsa draai y ta mihor so e lo bira.