Awe 27 di september nos ta celebrando Dia Internacional di Turismo, un fecha sigur di gran impotancia pa nos isla mirando cu turismo ta nos pilar economico di mas grandi.
Aruba na e momentonan aki ta riba e caminda di bira e trendsetter di turismo den nos region, cambionan grandi ta tumando lugar cu lo laga nos isla cana dos stap dilanti cu nos competidornan.
Creacion di dos fondo dedica specificamente pa turismo ta un parti importante di dje. E Aruba Tourism Marketing Fund (ATMF) a habri e posibilidad pa tin un fondo dedica unicamente pa mercadeo di nos isla den exterior, mientras cu e Tourism Product Enhancement Fund (TPEF) ta haci cu lo tin fondonan dedica exclusivamente pa mehora e calidad di e producto turistico na Aruba.
Mester menciona tambe e lanzamento di e imagen nobo y unifica di Aruba y e slogan “One Happy Island”, cual ta trece un imagen rehubeneci di nos isla den exterior y ta mustra tur loke nos isla tin pa ofrece caminda e sentido di orguyo di ta Arubiano ta reslata y ta wordo demostra na nos bishitantenan cu e cordialidad cu semper a caracteriza nos pida baranca.
Independizacion di ATA entrante 1 di januari 2011 ta un otro paso positivo riba e caminda di ta dos stap dilanti di nos competidornan.
E programa di certificacion pa tur esnan cu ta envolvi cu mundo turistico ta contribui tambe na engrandece nos industria turistico. E iniciativa alo ta relaciona directamente cu e imagen nobo di Aruba. Cada individuo den contacto directo cu nos bishitantenan ta influencia grandemente e experiencia di e turista. Cu e programa aki intencion ta pa ofrece nos hendenan e conocemento necesario pa nan por haci e mihor trabou posibel.
Tur e cambionan positivo aki mas e otronan cu ta na caminda ta solamente posibel danki na nos hendenan cu ta traha dia aden, dia afor ofreciendo lo mihor di nan pa mehora nos turismo. For di esnan cu tin contacto directo cu e turistanan, te esnan cu ta ehecuta maneho sea di restaurant, hotel, car rentals, instancianan cu ta traha den sector turistico manera ATA, AHATA y ATSA ta hunga un rol hopi importante den e desaroyo aki y ta danki na nan awe nos por bisa cu Aruba ta un di e paisnan den nos region cu mihor para ta na e momentonan aki pa loke ta trata turismo. Hopi ehecutivonan di biahe den exterior ta tuma Aruba como ehempel y ta mira cu wowonan positivo e cambionan cu ta tumando lugar na nos isla.
Mi kier a gradici y felicita cada un di boso cu directa of indirectamente a haci di turismo di Aruba un exito.
Feliz Dia Internacional di Turismo.

Otmar E. Oduber
Minister di Turismo, Transporte y Labor