ORANJESTAD – Durante e bishita di Minister Otmar Oduber na Colombia, el a logra yega na un letter of intent cu tanto PGA Latin Tours y Pacifico Rubiales Energy caminda cu ta haci posibel cu pa promer biaha na Aruba den luna di maart lo tin e evento di PGA Nationwide. Aruba lo ta e ultimo stop promer cu e final cu ta tuma lugar na Merca.
Ta trata aki di mas o menos 200 hungador internacional cu lo bin hunga riba tereno di Proam na Aruba.
Mester bisa cu pa varios aña a purba di logra un tipo di evento asina, pero debi na e costo sumamente halto di dje no a logra. Awor danki na entre otro e conversacionnan sumamente positivo cu Minister Otmar Oduber tabatin cu presidente di Pacifico Rubiales na Colombia, Sr. Arata, caminda a logra convencenan, a yega na un letter of intent caminda cu practicamente nan lo bay ta e sponsor mayor di e evento aki na Aruba. Esaki a haci posibel cu por a firma cu Sportlink cu ta e representante di PGA Latin Tour.
“Esaki ta un proyecto di mas o menos 1 miyon dollar total. Aruba su participacion den esaki lo ta di 250 mil dollar. E return on investment cu ta wordo calcula riba un proyecto asina aki ta impagabel si bo mira e cantidad di transmisionnan cu ta bay tin a traves di television, internet, prensa internacional cu lo ta na Aruba pa cubri esaki”, segun palabranan di Minister Oduber.
A logra conversa tambe cu representante di Sportlink cu tanto na Colombia como na Chile cu ta e dos paisnan cu nan lo pasa promer cu nan yega Aruba, nos lo haya cobertura completo.