ORANJESTAD -Durante conferencia di prensa Minister di Turismo, Otmar Oduber a anuncia e cifranan di turismo pa e promer 6 lunanan di aña, cual ta mustra un crecemento di 2.6% compara cu aña anterior pa loke ta trata e cantidad di turista cu ta bishita nos isla. E cifranan aki ta basa riba iformacionnan di Radex, SIAD, Banco Central y Oficina Central di Estadistica
Esaki ta encera cu nos a ricibi aproximadamente 10 mil turista adicional compara cu e promer 6 lunanan di 2009.
Na januari nos a conoce un crecemento di 3.1%, na februari un crecemento di 0.9%, na maart un crecemento di 14.5%, na april un caida di 3.4%, na mei un aumento di 4.7% y na juni un caida di 4.7%. Esaki ta duna un total pa e promer 6 lunanan di 2.6%.
E roomtax cu Gobierno a cobra den e promer semester di 2010 a aumenta cu 11%, cu ta mas o menos 2.4 miyon florin adicional.
Pa loke ta trata e tourist receipt (placa gasta dor di turista na Aruba) di januari pa juni esaki a aumenta cu 1.1% ( cu 90% di e analisis haci). E unico parti cu falta akinan ta e foreign banks account, cual unico efecto cu por tin ta un aumento.
E Avarage Daily Room Rate (ADR) pa e promer 3 lunanan di 2010 (falta ainda e rapport di e siguiente kwartal) a aumenta cu 2.3% di 227.74 dollar pa 233.13 dollar. Mescos por mira den e Revpar (revenue per available room) caminda den e promer kwartal di aña a experiensa un aumento di 9.8%, di 174.54 na 2009 pa 191.54 dollar na 2010.
E occupancy tambe ta mustra un aumento di 6.8%.
Pa Minister Otmar Oduber e cifranan aki ta sumamente positivo mirando e recesion y desaroyo pa loke ta trata e influencianan economico cu ainda nos ta sintiendo efectonan di dje, pero tambe mirando e maneho y consecuencianan politico y economico den e diferente paisnan caminda Aruba ta activo.
Mas aleu Minister di Turismo ta bisa cu a pesar cu e cifranan ta modera si compara nos desaroyo cu e region, Aruba ta bon para na e momentonan aki. Mirando cifranan di CTO (Caribbean Tourism Organisation), Aruba den tur categoria ta haciendo un mihor papel pa loke ta trata cantidad di bishitantenan, ADR, Revpar y hasta e placa cu turista ta gasta na nos isla.
“Mi ta kere cu e resultadonan aki ta refleho di e bon relacion cu tin na e momentonan aki entre oficina di turismo, AHATA, nos partnernan den exterior, pero tambe consecuencia di e diferente maniobranan fuera de lo comun, esta ‘gorilla marketing’ of ‘below the line’”.