ORANJESTAD -Parti di maneho nobo cu Minister di Turismo, Transporte y Labor, Otmar Oduber, a expresa y cu parti di e maneho y vision di Gobierno ta pa haci di Aruba un tipo di hub caminda cu por despacha y trece pasaheronan for di diferente lugarnan y hibanan pa otro destinacionnan.
Den e luz aki, a base di conversacionnan cu tabatin y particularmente di e cooperacion cu Venezolana (cu ya caba tabata biahando tres biaha pa siman for di Caracas y Maracaibo) conhuntamente cu Vision Air via charter, ta cuminsa dia 27 di juli awor vuelonan diario caminda Aruba lo sirbi como hub entre Venezuela y Miami.
Esaki no solamente ta haci realidad e vision pa Aruba bira un hub, pero tambe ta trece un oportunidad hopi grandi pa nos, particularmente for di mercado Venezolano riba un base diario. E vuelonan di Venezolana lo sali diariamente pa Aruba for di tres di e ciudadnan principal di Venezuela, esta Caracas, Maracaibo y Valencia.
E desaroyo nobo aki ta crea hopi negoshi pa aeropuerto di Aruba a traves di diferente feenan manera entre otro landing y parking fee. Esaki lo bira un herment extra pa por limita e caidanan fuerte cu tin for di Venezuela dor di e ambiente economico-politico cu tin na e pais aki, segun Minister Otmar Oduber a duna di conoce. “Pa nos, sigur cu braza habri, a hiba e conversacionnan aki”.
Diaranson mainta el a reuni cu representantenan di tanto Venezolana y Vision Air. Aki Minister Oduber a agrega cu pe ta un honor pa mira con un Arubiano ta destaca, den e caso aki, un yiu di tera cu ta na cabez di e proyecto aki, Sra. Xiomara Winklaar, yiu di Toko Winklaar.
Durante e reunion aki a elabora riba e relacion di trabou nobo aki cu ta encera aeropuerto, Gobierno di Aruba, turismo y Venezuela cu Miami cu ta bira e destinacion caminda cu Vision Air lo inicia e vuelonan.
Intencion ta cu Venezolana lo trece turistanan Venezolano pa Aruba for di e tres detinacionnan ariba menciona, aki nan lo aborda e vuelo di Vision Air rumbo pa Miami, cual ta e destinacion inicial di e acuerdo aki.
Mester bisa cu tin oportunidad tambe pa realiza un ‘dual destination’, esta cu e turistanan aki por keda Aruba un par di dia promer cu nan bay Miami of ora nan bin bek promer cu nan bay Venezuela.