ORANJESTAD – Expectativa ta grandi y piscadonan di tur distrito ta ancioso pa participa na e torneo di pesca di mas grandi di Aruba diadomingo proximo na Hadicurari na ocasion di dia di piscado. Cu mas di 3000 florin na premio efectivo, den dos categoria y cu 4 premio pa mayor ehemplar y mucho mas, e di 16 torneo di Dia di Piscado di Hadicurari ta priminti di bira un maximo atraccion pa tur piscado y nan famia.
E torneo tin categoria “tradicional crioyo” pa esnan cu ta pisca na man y den boto di tamaño mas chikito y un categoria “Open All Tackle” cual ta habri pa tur tipo y tamaño di boto y metodo (e.o. winch). Ademas manera a bira ta e custumber di Hadicurari pa promove seguridad riba lama, tur boto cu inscribi lo haya e flanelnan oranje y tambe ekipo di seguridad. Asina ta pues, e ta mustra un biaha mas di bira un torneo di piscado y pa piscado na beneficio di piscado.

CAPTAINS MEETING:
Diabierna awor tin e candeloso reunnion di capitan, unda e diferente distritonan ta topa otro, midi forsa y intercambia di preparativonan den un ambiente festivo. Tur miembro di Hadicurari, Union di Piscado y doño di boto y piscado en general ta ser invita pa atende e reunion di capitan, unda lo habri e inscripcion y alabes repasa e reglanan den un ambiente sumamente yen di goso di piscado pa cual Hadicurari ta conoci pe. Pesey percura pa diabierna 25 proximo pa 8’or en punto capitan y tripulacion yega na Centro di Pesca Hadicurari.

FESTIVAL DI CUMINDA DI LAMA:
Riba diadomingo 27 di juni benidero lo tene e celebracion di Dia di Piscado na e pier y centro na Noord. Ademas di un torneo di pesca lo tin un festival di cuminda crioyo y di lama, unda mas di 3 tent a la piscado ta ofrece publico un berdadero fiesta canto di lama for di 11’or di mainta caba. Mas cu claro e ambiente tipico di piscado, cu animacion di un DJ crioyo lo percura pa henter famia sinta gosa bou di tent. Despues di 3’or Banda SED ta subi escenario y ta habri e pista di baile pa grandi y hoben rek un pieza bailabel te cu 8’or di anochi. Lo tin homenahe na baluartenan di mundo di piscamento conforme e tradicion di Hadicurari y varios sorpresa mas. Un y tur ta invita y entrada ta gratis.