ORANJESTAD – Recientemente Sra. Monica Liliana Albisu di Nevquen Argentina a wordo honra na Costa Linda Beach Resort como Embahadora di Bon Boluntad. E motibo pa kiko Sra. Albisu a wordo honra ta pasobra e ta bishitando Aruba pa 20 anja consecutivo. Aruba Tourism Authority den presencia di Francis Jacobs, Relacionista Publico a honra Sra. Albisu na dicho resort den presencia di Miriam Rodriguez, Member Relations Manager, Gloria Janga, Assistant Member Relations Manager y Andres Caballero, Gym Instructor. Sra. Albisu tabata den compania di: Sra. Juana Helena Cutini Albisu (su querida Mama), Sylvia Noemi Alisu Gutierrez (ruman muher), Julian Samuel Serruya (jui homber), Monica Paola Volante (Amiga) y Mariano manrique (Amigo). Aparte cu Sra. Albisu ta abogado di prefesion e ta musico y pintora masha famoso na su pais. Probechando di su vacacion aki na Aruba cu su famia y amigonan Sra. Albisu lo expone pa prome biaha un exposicion di su artenan na Costa Linda mes Diaranson 16 di Juni, 2010 den lobby di dicho rerort. Adhunto por aprecia un flyer di e exposicion aki, un potret di un di su pinturanan y alavez un articolo cu a ser publica den e corant di su pais “Espectaculos”.Ta trata aki di un exposicion titular “Una Vida en Obra” cu a tuma lugar e anja aki na luna di Maart na su pais natal. Sr. Jacobs a haci e acto oficial de nomber di Gobierno di Aruba y alavez a gradici Sra. Albisu pa e lealtad demostra pa 20 anja biniendo Aruba. Segun Sra. Albisu, e motibonan cu e ta biniendo asina tanto anja Aruba ta: nos Turismo, veriedad di deporte na Aruba, tin hopi interes cultural, Aruba ta ideal pa e por trece su famia y amigonan y e ta stima Aruba. Masha pabien na Sra. Monica Liliana Albisu.