ORANJESTAD/WASHINGTON- Minister Michelle Hooyboer-Winklaar a atende 15 reunion den apenas 3 dia di su prome bishita di trabou na Merca. Un di e encuentronan aki tabata na e U.S. Department of the Interior, National Park Service. Aki e mandatario local a reuni cu Stephen Morris, director di e “Office of International Affairs”. Separa di e director, den e reunion tambe tabata presente henter e team di maneho di e organisacion, incluyendo George McDonald kende ta coordina e division conoci como “Youth Programs”.

E motibo di e bishita aki tabata pa explora e posibilidadnan pa haña mas informacion tocante di “Park Services”, “Park Management” y “Youth Programs” cu e instancia gubernamental ta organisa den tur nan parkenan nacional.

Durante e reunion a ripara cu e diferente retonan cu nos ta confronta den nos parke aki na Aruba, tambe ta bon conoci serca e ehecutivonan di Park Services di Washington DC aya na Merca. Tambe a intercambia ideanan con pa sera lasonan mas estrecho entre Parke Nacional Arikok di Aruba y nan mas di 400 parkenan nacional tur rond di Merca. Hasta a habri posibilidad di sera un “Sister Agreement” entre Parke Nacional Arikok y un di e parknan di Merca unda lo por haci intercambio di trahadornan y setup un “cross-marketing program” entre e dos parkenan cu lo habri un mercado pa otro tipo di turista pa Aruba.

Prome cu fin di aña un representante di US Park Services lo haci un bishita di cortesia na Aruba y lo sera conoci mas di serca cu nos Parke Nacional Arikok. E idea ta pa e ora ey yega na acuerdonan mas concreto con por traha hunto y logra yega na un Mercado mucho mas grandi di bishitantenan di nos tesoro natural.