ORANJESTAD/WILLEMSTAD-Temporada di orkan 2010 pa Region Atlántiko di Orkan (parti nort di Osean Atlántiko, Laman Karibe i Golfo di Mexico) entre tantu ya a kuminsá dos siman pasá (1 di yüni) i ta terminá ofisialmente 30 di novèmber.
Manera ta konosí, e aña aki lo ta hopi mas aktivo ku aña pasá. Perspektivanan di tantu National Oceanic and
Atmospheric Administration (NOAA) komo Colorado State University ta indiká ku temporada di orkan 2010 lo
bira un periodo bastante drùk. Ekspresá den porsentahe, ta antisipá ku e temporada di orkan aki lo ta 95%
mas drùk ku promedio.
For di 1949, tabatin kuater aña ku kondishonnan similar: 1958, 1966, 1969 i 2005.
Mayoria hende fásilmente lo kòrda kon drùk 2005 tabata ku orkannan notorio manera Katrina, Rita i Wilma.
E pronóstikonan aki ta basá riba entre otro temperatura di awa di laman den e partinan tropikal di Oseannan
Atlántiko i Pasífiko. E fenómeno di El Niño (awa di laman mas kalor ku kustumber) den Osean Pasífiko, aña
pasá a suprimí aktividat di orkan den e Region Atlántiko di Orkan, dor di kousa bientunan fuerte na nivel haltu
di atmósfera. E fenómeno aki a disparsé entre tantu i bientunan na nivel haltu riba nos region ta muchu mas
suak aktualmente. Ademas di esei, temperatura di awa di laman den tantu parti tropikal di Osean Atlántiko
komo den Laman Karibe ta mas haltu ku normalmente t’e kaso. E dos desaroyonan aki ta e motibunan
prinsipal dikon e temporada aki ta menasá di bira mas aktivo ku loke ta kustumber pa e region aki. Tambe e
kantidat di áwaseru antisipá durante di próksimo lunanan, pa e mesun motibu aki lo ta mas grandi ku
kustumber den nos region.
Ya ku ta antisipá un temporada aktivo, ta bon pa kuminsá hasi e preparashonnan nesesario i tuma medida
apropiá, den koordinashon ku outoridatnan lokal, por si akaso mester saka atvertensha. Ta rekomendá tur
hende pa konsultá buki di telefon, ya nan sa kiko mester hasi den kaso ku un tormenta tropikal òf orkan
menasá nos islanan. Mester remarká sin embargo ku e perspektivanan aki di temporada no ta duna ningun
indikashon ki dia ni unda e tormentanan ku ta ser pronostiká lo forma, ni kon nan ta bai move.
Manera ta kustumber, Servisio Meteorológiko di Antianan Hulandes i Aruba (MDNAA) lo monitoriá desaroyo di
e sistemanan aki i otro sistemanan di mal tempu ku ta menasá tantu Islariba komo Islanan ABC, ku hopi
atenshon. Den kaso ku esei ta nesesario, lo emití e or’ei atvertensha (Boletin Spesial) pa eventonan di mal
tempu. Den kaso ku mester saka atvertensha pa siklon tropikal, esei lo sosodé den kooperashon estrecho ku
National Hurricane Center na Miami, Florida, ku ta un asina yamá Sentro Meteorológiko Regional Spesialisá di
Organisashon Mundial di Meteorologia.
Kambionan den produktonan pa temporada di orkan 2010:
· Durante di e reunion di RA IV Hurricane Committee (direktornan di servisionan meteorológiko
nashonal den nos region) na mart di e aña aki a disidí lo siguiente:
o Kuminsando e aña aki, National Hurricane Center lo saka un Tropical Storm òf Hurricane
Watch ora ku no mas ku 48 ora (tabata 36 ora) delantá ta antisipá posibilidat di un tormenta
tropikal òf orkan den sierto region.
o Lo emití un Tropical Storm òf Hurricane Warning ora ku no mas ku 36 ora (tabata 24 ora) ta
antisipá yegada di un tormenta tropikal òf orkan den sierto region.
· Den e boletinnan di atvertensha (advisory) ku Servisio Meteorológiko ta emití, lo pone mas énfasis riba
efektonan lokal di sierto siklon tropikal.
Bon pa kòrda:
· Emitimentu di e relato mensual, ku a ser introdusí aña pasá, lo ser kontinuá e aña aki.
· Ta rekordá tur hende ku e último pronóstiko di tempu òf boletinnan di alerta/atvertensha por ser hañá
riba nan telefon selular via di http://www.weather.an/mobile/.
· Lesa mas riba siklon tropikal den nos foyetonan ku yama “Guide on the Tropical Cyclone Early Warning
System for the Netherlands Antilles and Aruba” i “Hurricanes and Tropical Storms in the Netherlands
Antilles and Aruba” ku por ser hañá riba nos página di Internet (http://www.meteo.an).
Na nivel nashonal, Servisio Meteorológiko lo koordiná ku outoridatnan di kombatimentu di desaster riba kada
isla pa konsientisá públiko riba e peligernan ku e sistemanan aki ta forma. Di e manera ei, nan por prepará
nan mes mas mihó posibel pa temporada di orkan.