ORANJESTAD/KRALENDIJK – Mescos cu aki na Aruba, den henter Reino Hulandes a tuma lugar entregamento di condecoracion real. Na tur a condecora 36 persona na Antiyas y Aruba den nomber di Su Mahestad Reina Beatrix. Mientras cu na Aruba a condecora un solo hende muher, na Antiyas tabatin 9 hende muher cu a ricibi condecoracion real. Un di nan ta e Arubiana conoci como Marisela Albertina Constansa Croes-Oduber. Ta trata aki di e unico yui muher di e conocido Harold y Fanny Oduber di e prestigioso compania Oduber Agencies di Aruba. Marisela ta ruman muher di Jacobo (Jacky), Eddy y Gerardo Oduber.
Durante un ceremonia oficial cu a tuma lugar siman pasa na Boneiro, Gezaghebber mr. Glenn Thode a repasa e motibonan dicon a dicidi pa condecora e Arubiana residencia pa hopi anja na Boneiro como “Ridder in de Orde van Oranje Nassau”. Marisela Croes di 54 aña di edad a traha como laborant na St. Elisabeth Hospitaal y despues como gerente di Oduber Agencies na Corsou. Ora cu ela bay establece su mes na Boneiro ela ocupa e puesto di gerente di Air Services Netherlands Antilles y tambe di Drive Yourself Bonaire. Awendia Marisela Croes ta gerente/accionista di Rocargo Services N.V. na Aruba, Boneiro y na Corsou.
Durante e discurso di Gezaghebber Glenn Thodé, ela bisa cu desde cu Marisela Croes a establece su mes na Boneiro cu ela sa di dedica hopi di su tempo liber na bienestar di e hubentud Boneriano y esnan di menos recurso den comunidad. E ta haci esaki entre otro dor di su participacion activo den organisacionnan manera “Fundacion Yudami bisa no” cu ta traha riba prevencion di uso di droga. Tambe e tabata miembro di Stichting Zr. Maria Höppner cu ta traha pa yuda muchanan descuida y maltrata. E ta miembro di Stichting Galiña cu ta traduci y distribui bukinan pa mucha “Kuifje Spenser”. E tabata miembro y e prome president femenino di AKIB, “Vereniging Bedrijfsleven Bonaire”. Den e posicion ey mes ela keda eligi dor di Prensa Boneriano como “Woman of the Year” di Boneiro na anja 1990. Desde anja 2004 e ta miembro di Rotary Club y entre anja 2006 pa 2007 e tabata Presidente di e organisacion. Hunto cu e club aki ela organisa “Proyecto BIS” cu ta percura pa 330 mucha di Boneiro por ricibi desayuno tur mainta. Tambe e anja aki nan a percura pa 110 mucha di menos recurso por a haya nan uniform di scol. Desde anja 1987 pa 2006 e tabata un di e organisadornan di e “Bonaire International Fishing Tournament” y desde anja 2007 e ta Presidente di Tourism Corporation Bonaire.
Marisela Croes-Oduber ta un persona cu semper ta cla pa yuda, un disciplina cu ela adopta di su famia y manera un bon Arubiano. Su famia, pero specialmente su mayornan ta masha orguyoso di e logro aki pa nan yui, siendo un bon ehempel na Boneiro y awor aprecia oficialmente por medio di un condecoracion real. Marisela Croes-Oduber tin un grupo grandi di amigo y amistadnan na Aruba, pasobra no obstante cu e ta biba na Boneiro, semper ela keda bin su isla natal cu masha regularidad.
