ORANJESTAD – Na ocasion di celebracion di Aña di La Reina, Su Excelencia Gobernador señor Freddy Refunjol a condecora seis ciudadano dia 29 di april.
Mester menciona cu pa prome bes den historia di Aruba un ciudadano ta ricibi e condecoracion di “Orde in de Nederlandse Leeuw” y esaki ta bay pa e scientifico Arubano dr. Edward Cheung kende ta residencia na Estados Unidos.
Dr. Cheung no por tabata presente, pero lo ricibi su condecoracion na un otro ocasion.
Gobernador a enfatisa cu e trabou boluntario cu hopi di nos ciudadanonan ta haci ta manera un azeta cu ta crea un comunidad social. Nos comunidad mester di boluntarionan pa traha na diferente nivel pa nos hendenan, specialmente pa nos hobennan y esnan den necesidad.
Gobernador a repasa e carera di esnan cu a ricibi un condecoracion refiriendo na nan trabou boluntario den nos comunidad.
E conocido tenista Edward (Eddy) Ras a ricibi e condecoracion di “Ridder in de Orde van Oranje Nassau” pa su dedicacion pa e deporte di tennis, specialmente pa e hobennan.. Eddy ta un hungador di tennis pa mas cu cuarenta aña y a sa di pone diferente premio ariba su nomber y tambe a representa Aruba den exterior. Su scol di tennis Eagle International Tennis Academy tin como 400 alumno di tur edad.
Marcelo Croes a ricibi e condecoracion di “lid in de Orde van Oranje Nassau” for di Gobernador. Marcelo ta masha activo ariba tereno di football cu e ekipo di Brazil Juniors. No solamente e ta entrenador, pero ta busca e muchanan na cas, hiba nan bek y tambe sa cumpra material pa hungadornan por uza. Tambe e sa fungi como referee official di AVB.
John Fun tambe a bira “lid in de Orde van Oranje Nassau” pa su trabounan boluntario den diferente fundacion manera FUNARI, FAVI y Ban Uni Man pa yuda nos muchanan. Specialmente e proyecto di Ban Uni Man ta uno hopi bunita door cu e boluntarionan ta percura tur dia pa hopi mucha na scol haya un desayuno. E fundacion ta depende di boluntarionan manera John Fun y tambe di donacion di diferente instancia pa cumpli cu e meta.
Castro Perez, conocido ciudadano envolvi den entre otro e proyecto di Aruba Reef Care a ricibi e condecoracion como “lid in de Orde van Oranje Nassau”. Pa hopi aña Castro ta encabesa e proyecto cu ta percura pa haci limpi banda di e beachnan, ariba rif y tambe den laman. Tambe e organisacion ta duna charla na scolnan pa conscientisa e hubentud tocante e importancia pa cuida e bida maritimo. Anualmente mas cu 40.000 persona ta sambuya den e awanan di Aruba pero e hendenan aki tambe mester bira mas consciente di nan actividadnan bou awa cu por afecta e ecosistema bou lama.
Mester aplaudi e iniciativa di Aruba Reef Care Proyect cu anualmente por conta cu mas y mas boluntario pa nan actividadnan y ta fungi manera un katalisator pa otro instancianan tambe dedica nan mes na cuida e beachnan, e rifnan y e areanan bou lama.
No ta sosode tur ora cu un pareha ta haya un condecoracion y e biaha aki a toca Mathias Thiel y su esposa Guillermina Thiel-Caster. Guillermina ta hopi conoci pa su trabounan den FAVI pa hopi tempo. For di e edad di 11 aña el a bira visualmente incapacita, pero esaki no a strob’e di sigui studia y traha. El a sa di surpasa tur barera pa e por a ocupa un trabou den comunidad.
Mathias tambe ta hopi activo den FAVI y tambe cu e deporte di baseball Little League.
Durante su carera como funcionario publico el a forma parti di e directiva di ANAAB, sindicato pa empleadonan publico.
Na final di e ceremonia e condecoradonan a ricibi pabien di parti di Gobernador y señora, Prome Ministro mr. Mike Eman, Presidente di Parlamento drs. Andy Lee y demas ministronan presente y otro invitadonan.
Mester mira e reconocemento di e trabou boluntario di diferente ciudadano como un como estimulo pa otronanan tambe pa dedica tempo na e bienestar social, cultural, educativo y deportivo di nos hendenan, specialmente di nos hobennan.