ORANJESTAD/ WILLEMSTAD/DEN HAAG – Despues di algun dia di debate fuerte y skèrpi y deliberacionnan intensivo tras di cortina pa scapa e proseso di desmantelacion di Antiyas Hulandes, diahuebs mainta Tweede Kamer a bai di akuerdo ku e pakete di ley di consenso y cambio di Statuut cu forma base di e proseso aki. 
Tabatin hopi alegria den seno di e delegacionnan di Antiyas Hulandes, Kòrsou i Sint Maarten pa e logro aki. Promé minister Emily de Jongh-Elhage ku a hunga un papel instrumental den e último oranan, a gradicí tambe e delegacion di Aruba pa su aporte constructivo na e proceso.
Mester bisa, ku ainda algu promé ku e votacion a cuminsá diahuebs mainta, tabatin duda si tur cos lo a caba bon. Un esfuerso di último ora ku a dura te den oranan di mainta, a skapa e proseso, despues ku a yega na un enmienda riba e lei di polis pa e dos paisnan nobo den Reino ku por a carga aprobacion di e esnan ku a entregé. E ley aki a causa hopi controversia den e último dianan, como cu e lo nifiká eliminacion di e cooperacion di recherche den Reino den 2 aña di tempo, miéntras ku lo lanta un Gemeenschappelijk Politievoorziening (GPV) ku lo tabatin su base den e entidadnan autónomo nobo. E miembronan Remkes (VVD), Van Bochove (CDA) i Leerdam (PvdA) tin duda ku e paisnan nobo Kòrsou, pero prinsipalmente Sint Maarten lo tin suficiente capasidat pa combatí criminalidad, spesíficamente criminalidad organisá internacional. Den e enmienda nobo a dicidí, ku RST lo ta enbolbí durante un periodo di 4 aña mas.
Tur e otro leinan a haña un aseptacion mayoritario grandi den Tweede Kamer, inkluyendo e lei di konsenso pa un Korte Komun, Ministerio Públiko, Conseho pa Mantencion di Órden, Delimitacion Marítimo entre Kòrsou/Boneiru i Sint Maarten/Saba, Reglamentu di Gobernador pa Kòrsou, Reglamentu di Gobernador pa Sint Maarten y e ley pa cambio di Statuut. Un proposicion di Partij voor de Vrijheid pa para e proseso pa sanea debe di Antia ku 1.7 miyon Euro a haña un derRota fulminante, 120 miembro a vota kontra, 9 di PVV a duna nan sosten.
Promé cu e votacion, promé minister di Antia Emily de Jongh-Elhage a mustra un biaha mas riba e fecha históriko di awe. “Loke ta riba mesa ta loke e pueblonan di Antia mes a deseá, di un banda tin laso mas directo ku Hulanda y di otro banda relacionnan mas intensivo den Reino, pero ku un status Autónomo. Leve het Koninkrijk!”, asina sra. de Jongh-Elhage a bisa captando un aplauso di e cantidat di hende ku tabatin den sala di reunion. E tribuna públiko tambe tabata bon ocupá. A hiba palabranan tambe e presidente di Staten di Antiyas Hulandes, Pedro Atacho y di Aruba Andy Lee. Por a nota ku e delegashon di Antiyas Hulandes, Kòrsou i Sint Maarten tabata visiblemente aliviá, despues di algun dia di intenso debate, pero prinsipalmente lòbimentu pisá for di bista di públiko.
Pa loke ta trata e enmienda di polis, a disidí, ku RST lo keda exsistí 4 aña mas, tanten ta traha riba lantamentu di e GPV. Den e promé enmienda a papia di dos aña. Miembro di VVD Johan Remkes a bisa bon cla, cu su deseo ta sigui riba mesa pa mantené RST pa un periodo mas largu cu 4 aña.Pa loke ta trata e enmienda di polis, a disidí, ku RST lo keda eksistí 4 aña mas, tanten ta traha riba lantamentu di e GPV. Den e promé enmienda a papia di dos aña. Miembro di VVD Johan Remkes a bisa bon kla, ku su deseo ta sigui riba mesa pa mantené RST pa un periodo mas largu ku 4 aña.
