ORANJESTAD – Cu sumo placer Comision Organisador di Premio Promocional Santa Anna ta anuncia e ganador di dicho premio pa aña 2010. E aña aki e premio ta bai pa Sr. Jacobo Pedro Henriquez, cariñosamente yama Pedro. Pedro a nace dia 26 di november 1941. E ta casa su sra. Louisa Henriquez y tin 4 yiu, 11 nieta y 2 bisanieto/a. Den su infancia Pedro a bishita St. Aloysiusschool na Noord y tawata masha activo riba tereno di futbol.

Dia 5 di juni 1969 ta sosode un accidente grave cu Pedro y su amigo Binchi, den cual ta sosode cosnan inexplicable cu ta cambia su bida pa semper. Despues di 22 dia den coma Pedro ta bin na tino. E mester a siña cana, papia poco poco di nobo. Pero Señor por medio di Dr. Jose Gregorio Hernandez a hasi milager p’e. Pedro a tuma e proposito y a priminti di dedica su bida den sirbishi di Señor, por medio di Dr. J.G. Hernandez.

Dia 3 di maart 1970 el a cuminsa cu un centro di oracion na Monserat #2 na honor di Dr. Jose G. Hernandez. Hopi cristian tawata y ta acudi na e centro pa rindi honor y alaba Señor. E aña aki, 3 di maart 2010, e centro a cumpli 40 aña di existencia. Esaki ta muestra di perserverancia y fe den nos Señor Todopoderoso y muestra di su cumplimento di promesa. Sr. Pedro, apesar di no a keda completamente bon fisicamente, no a laga esey strob’e. E ta e fundador di e centro di oracion, ta co-fundador di Deportivo Nacional y ta den sirbishi di Iglesia Catolico den Parokia di Noord desde 1975 te cu awe. Tambe e tawata activo den Conseho Parokial di Noord y Asistencia Social di Noord. E tawata prepara mayornan pa bautismo di nan yiu. El a organisa peregrinacion di fielnan pa Isnotu, e pueblo natal di Dr. Jose G. Hernandez, y tambe pa Corsow y Boneiro. Ainda Pedro ta masha activo den Iglesia Santa Anna yudando pastor durante diferente ocasion. Actualmente Pedro ta trahando na Centro di Bario Noord como “beheerder” y a sa di funda team di domino C.B.Noord.

Pedro hunto cu su team di domino a sa di nomber di Aruba bon na halto den exterior e.o. Corsow y Boneiro. En corto Pedro ta un persona humilde, carismatico, alegre y semper dispuesto pa yuda. Un pabien ta bay na su persona y henter su famia. PABIEN PUEBLO DI NOORD.