ORANJESTAD - Cifranan di World Tourism Organization (WTO) pa loke ta turismo mundial na 2011 ta conoci y por bisa cu Aruba su resultadonan tabata  mas halto cu e resultadonan mundial y hopi mas cu e resultado di turismo den Caribe.

Manera ta conoci, Aruba a conoce un crecemento di 5.7% den turismo stay over durante 2011, surpasando e crecemento estableci na cuminzamento di aña, cual tabata di 3%.

Segun e cifranan di WTO yegadanan di turismo internacional a crece cu 4.4% yegando na 939 miyon compara cu e 939 miyon na 2010.

Den Caribe e crecemento tabata mas limita, creciendo cu 4% y manteniendo asina su cifranan di crecemento di 2010. Esaki compara cu e cifranan di crecemento na Aruba ta mustra un rendimento hopi mas halto di nos isla, surpasando Caribe cu 1.7%.

Otro dato importante di WTO ta indica cu e datonan disponibel pa loke ta trata entrada cu turistanan a laga atras ta sigui di serca e tendencia positivo di e yegadanan. Akinan por bisa cu Aruba a surpasa esakinan grandemente caminda cu basa riba cifranan di Banco Central den e di tres kwartal di 2011 entradanan ricibi proveniente di turismo a crece cu 10% y di januari pa september un crecemento den entrada laga pa turistanan di 9%.

Minister Otmar Oduber ta sumamente orguyoso di e resultadonan aki y ta gradici tur e partnernan cu a haci cu Aruba un biaha mas ta resaltando pa cu e bon resultadonan den nos industria principal compara cu no solamente Caribe, pero tambe e promedio di crecemento mundial.

E ta duna di conoce cu su maneho lo sigui ta uno enfoca riba diversificacion di mercado, mehoracion di Producto Aruba den su totalidad y atrae turistanan cu ta gasta mas, contribuyendo asina na bienestar di nos economia.

Pa loke ta 2012 e meta di crecemento cu Aruba a stipula pa loke ta turismo stay over ta di 3%, cual ta e mesun promedio cu WTO tin pa crecemento di turismo mundial, esta entre 3% y 4%.

“Nos lo sigui ehecuta un maneho cu e meta pa Aruba cana 2 stap dilanti di nos competidornan”, Minister Otmar Oduber a duna di conoce.

ORANJESTAD – La Cabana Beach & Racquet Club a organisa un evento anima di Carnaval den e Chit Chat Café, incluyendo un Eleccion di Reina cu a entretene tur hende. E candidatanan pa e Eleccion di Reina, Genoveva, Adriene, Stephanie, Rosanne, y Dayline a representa varios departamento di e resort, y siguiendo un competencia excitante, Stephanie Maduro, kende tambe ta e resort su Empleado di Aña, for di e departamento di Food & Beverage, a logra di bai cu e corona y sjerp, demostrando su spirito di Carnaval, bailando cu hopi alegria hunto cu Prince Bo y Pancho Conco. Damien di e Oficina Ehecutivo a yuda corona e reina nobo, kende a tuma over e titulo for di e Reina saliente, Yadira di e departamento di Housekeeping, kende a representa La Cabana na tur parada, demostrando su gran amor pa bida, y dunando di su tempo generosamente, pa promove e resort.

Cu personalidad di radio Elsa Krosendijk como emcee, e fiesta na e Chit Chat Café a percura pa tremendo diberticion, combina cu un lunch delicioso!

ORANJESTAD -Awe Royal Caribbean International lo ta anunciando e lanzamento di nan barco crucero Vision of the Seas den un serie di cruceronan mas largo den Caribe y Canal di Panama pa e temporada di winter 2012-2013 y Aruba lo ta parti di dje.

Manera ta conoci aña pasa Minister Otmar Oduber a reuni cu ehecutivonan di diferente lineanan crucero na Merca, entre nan Royal Caribbean International, caminda a papia riba e diferente proyectonan y plannan pa futuro, logicamente promocionando Aruba como un puerto pa cu e diferente cruceronan.

Su maneho semper a bin ta pa traha no solamente pa presente, pero tambe planifica y logra cosnan grandi pa futuro y bishita di e crucero aki ta un logro mas no solamente pa Minister Oduber, pero pa henter Aruba

Awe por mira cu e maneho di Minister di Turismo, Transporte y Labor ta sigui duna su frutanan. Despues di e regreso di Carnival Cruises, aumento di turistanan crucero, awor por bisa orguyosamente cu pa e temporada crucero 2012-2013 Aruba lo tin un total di 5 calls di e crucero Vision of the Seas.

E barco aki ta carga un total di 2 mil pasahero, lo cual ta encera un total di 10 mil turista adicional cu lo ta bishitando nos isla, banda di e tripulacion. Pa economia di nos isla esaki ta algo hopi positivo mirando cu e turista crucero ta laga un promedio di 100 dollar atras durante nan estadia di un dia na Aruba.

Minister Otmar Oduber ta sumamente satisfecho cu e anuncio aki y ta gradici tur esnan cu a colabora pa haci e callnan di Vision of the Seas na Aruba posibel.

<iframe width=”420″ height=”315″ src=”http://www.youtube.com/embed/uqvB3HE2Sfc” frameborder=”0″ allowfullscreen></iframe>