E asociadonan di Radisson a disfruta di un cena y baile elegante di fin di aña
Palm Beach – E asociadonan di Radisson a wordo invita pa e celebracion tradicional di fin di aña, cu nada mas cu diberticion riba e programa. Cu e premiacionnan anual di fin di aña programa pa tuma luga na cuminsamento di Januari, e fiesta den e Grand Caribbean Ballroom a conta cu un fluho continuo di cuminda, bebida y musica di baile cu e banda tan gusta, Tsunami. 
E resort su miembronan di e comision ehecutivo, hunto cu Gerente General Rob Smith y su esposaDiana, tabata presente pa asina yama e asociadonan cu nan invitadonan bon bini na e fiesta, y desea nan un anochi placentero, gradiciendo nan pa nan contribucionnan durante e resort su refrescamento den e aña saliente, cu un bista awo riba e aña benidero, y tur e bendicionnan y retonan cu e lo por bin cune.

Publico presente den e Tourism Summit cu a tuma lugar siman pasa tabata impresiona cu e investigacion extenso cu a wordo realiza riba futuro di Producto Aruba. E impresion aki tabata basa riba con extenso e investigacion realiza tabata y e resultado cu esaki a produci.
Cumbre di Turismo “Winning the Future” organisa dor di Ministerio di Turismo y su Titular Otmar Oduber siman pasa den Reinaissance Convention Center, a trece personalidadnan di diferente sectornan di comunidad hunto. Un y tur por a scucha e resultado preliminar di un investigacion realiza pa un ekipo di seis persona di Universidad Central di Florida, y encabeza pa dr. Robertico Croes.
Casi un aña pasa Minister Otmar Oduber a haci un apelacion na dr. Tico Croes pa investiga si e modelo usa pa promove Producto Aruba e ultimo 25 añanan, lo ta mes efectivo pa e proximo añanan. Y e resultado tabata cu apesar e producto ta fuerte, e gusto y preferencianan di e bishitantenan di Aruba ta cambiando cu generacion.
Lisette Malmberg, un persona conoci den sector di turismo ademas di ta un lider spiritual, a forma parti di un panel e dos dianan di e cumbre cu e tarea pa haci remarca y preguntanan encuanto e investigacion.
“E resultado di e investigacion, ta e comienso di un proceso, e no ta e fin. Nos tin cu bay rediseña Aruba su producto y wak con pa hibe na un otro nivel den e siglo aki, sra. Malmberg a duna di conoce na final di e evento.
Aunke cu algun aspecto cu a bin dilanti den e estudio tabata na conocemento di esnan den mundo di turismo, e formato den cual esaki a wordo realiza no tabata na nan alcanse cu por a haya tur e datonan concreto cu tin aworaki. E proceduranan di analisis cu a wordo usa, ta duna Aruba un fuente di informacion cu combinando esaki por duna Aruba e base pa traha riba dje.
“Mi ta kere cu e ta fantastico,” tabata e reaccion di sra. Malmberg ora cu a pidi’e pa su opinion personal riba e decision pa realiza e investigacion aki. E punto ta, cu e iniciativa a wordo tuma, actuando di forma pro-activo cu e industria. “No ta sinta warda e cambionan yega riba nos, pero nos ta pro-activo pa tin plannan di accion riba e cambionan,” el a duna di conoce.
Dr. Croes tabata masha satisfecho cu e dos dianan dedica na e cumbre aki. Aunke cu e no a combersa cu tur hende, pero for di e reaccion di e panel, el a haya e chens pa splica algun detaye mas specifico. Di otro banda, Profesor Croes tabata masha contento di mira un publico asina varia presente, caminda a hala su atencion e grupo di entrepreneurnan hoben cu tambe a haci pregunta. “E ta un bon señal pa futuro di Aruba, e ta demostra cu nan ta interes y cu nan ta participa den e discusionnan. E intencion di e agenda di unda Aruba mester bay, ta cu e ta wordo carga y discuti,” segun Dr. Croes.
Pa loke ta e encuesta mes, dr. Croes tabata masha satisfecho pa e cooperacion cu nan a ricibi di e pueblo en general, cual no a sorprende ya cu Aruba y su hendenan semper tabata gusta di papia di futuro y ta pensa hopi riba nan pais. Y mi ta contento cu ora cu mi a bolbe dies aña despues, e mesun sentimentonan aki ta existi,” el a duna di conoce.

ORANJESTAD -Durante apertura oficial di Trop Club and Casino, Minister Otmar Oduber a desea palabra di exito y pabien na henter gerencia di Tropicana Resort y Trop Club and Casino.
El a indica cu tabata un trayectoria hopi largo y un compromiso cu tabatin pa cu e resort cual tabata un di e promer retonan cu el a haya na momento cu el a asumi responsabilidad. “E parti mas alegre ta cu bo ta mira un cantidad di trahadornan cu no a logra haya trabou, awe despues di 10 luna nan a logra haya trabou y nan ta contento cu esaki. Nos a conversa cu hopi di nan”.
E grupo a haci inversionnan grandi na e resort, a hinca alrededor di 4 miyon florin den e casino y asina prepara nan mes pa un inversion hopi grandi pa e casino grandi y tambe e resort.
E mandatario a adelanta cu e casino cu a caba di habri su portanan, dentro di un aña y mei lo ta e lobby di e resort.
Minister Oduber a gradici Brian Stedeford, General Manager di e resort y casino pa nan interes na Aruba y e inversionnan cu nan a haci pa saca e propiedad aki for di bancarota, caminda awe tin riba 125 trahador entre e resort y e casino.