Recientemente tabata ta Aruba un grupo selecta entre operador nan di tour y tambe agente nan di viajes di Brazil. Despues cu e aeroliña AVIANCA a expande su vuelo nan pa Brazil, e Mercado di Brazil a bira mas atractivo pa Aruba y Aruba Tourism Authority a provecha e ocashon aki y a invita e mihor agentenan di viajes di Brazil pa bin sera conoci cu nos dushi isla di Aruba. Segun commentario di e lider di e grupo Srta. Beatrix Santos di ATA Brazil, cu Aruba ta hopi bon prepara pa qualquier Mercado di turismo mundial y masque cu nos competidor ta Republica Dominicana, nan no por garantiza e parti di seguridad pa nan bishitante nan, manera Aruba. Sr. Ricardo Croes di ATA a coordina un bunita programa durante nan estadia y a bishita mayoria di nos hotel nan. Westin Aruba Resort & Casino tabata e hotel anfitrion. Ariba e potretnan por aprecia e grupo di agente nan di bishita na Taste of Belgium , De Palm Island, Divi Divi Resort, tambe durante e Island Tour na California Light house y pa ultimo Sr. Croes junto cu e leader di e grupo Srta. Beatrix Santos di ATA Brazil.

Oranjestad – Aruba 25 years Staus Aparte.

ORANJESTAD/TORONTO -Diadomingo 6 di November 2011 den oranan di merdia e prome vuelo di Sunwing Airlines conhuntamente cu operador Signature Vacations a yega Aruba. Un caluroso bonbini a wordo duna door di Sra. Ronella Tjin Asjoe-Croes, CEO di Aruba Tourism Authority,

Sr. Peter Steinmetz, director di Aruba Airport Authority y Sr. Jim Hepple, CEO di AHATA. E Boeing 737-800 tin un capacidad di 189 pasahero y lo ta bulando tur diadomingo for di Toronto Aruba durante henter aña . Adicionalmente un segundo vuelo lo wordo agrega cuminsando for di december 15. E vuelo adicional lo ta riba diamars y lo forma parti di e itinerario pa e lunanan di invierno.

E compania Sunwing ta un aerolinea hopi renombra den e mercado di Canada unda cu a logra obtene e premio di e aerolinea number 1 den e parti di leisure escohi pa e agentenan di viahe di Canada. Den ocho aña di existencia e aerolinea aki a bira un di e companianan mas importante den e mundo di viahe y awendia ta bula pa 33 destinashon den Canada. E operador Signature Vacations tambe tin un hopi bon nomber y imagen pa cu paketenan di vacacion cual ta ofrece su servicionan na mas di 350,000 pasaheronan anualmente.

E piloto cu a bula e prome vuelo pa Aruba tawata Sr. Damian Cuminsky y a wordo compana pa Sr. Gary Ogden, VP Commercial Operations y Sra. Susan Olanda cual ta e gerente di promotional and program development pa Signature Vacations. 18 agentenan di viahe invita pa Aruba Tourism Authority a yega riba e vuelo aki, nan a wordo acompana door di Sra. Colleen Lessard cual ta e gerente di benta di ATA pa e mercado di Canada.

Un programa a wordo prepara pa e agentenan di biahe na unda cu nan lo haya e oportunidad di haya sa loke Aruba tin di ofrece como producto turistico. Nan lo ta hospedando na RIU, y den e transcurso di nan estadia nan lo hasi diferente inspeccion na otro hotelnan y tambe participa na diferente actividadnan terrestal y aquatico. E compania El Tours lo e ground handler cu lo ta esun cu lo traha cu e operador Signature Vacations” na Aruba. Hotelnan cu tambe ta forma parti di e programa di Signature Vacations ta Amsterdam Manor Beach Resort, Bucuti Beach Resort, Radisson Aruba Resort, The Mill Resort & Suites, The Brickell Bay Beach Club y The Westin Resort.

Canada ta keda un mercado importante, cu a conoce un crecemento di 6.9 for di januari te cu september 2011 compara cu 2010. E ta un mercado di charter cu vuelonan directo cual ta hasi Aruba un destinacion hopi atractivo especialmente den temporada di invierno. Aruba ta wordo considera un destinacion di calidad halto compara cu otro destinacionan den Caribe. Resultadonan di Canada ta positivo y pronosticonan ta mustra cu 2012 no lo ta diferente, especialmente debi na e diferente opcionan cu tin aworaki pa yega Aruba.