ORANJESTAD – Un fiesta special di cocktail na Renaissance Convention Center a marca e aniversarionan di un cantidad record di empleado, celebrando un logro den nan carera durante e ultimo cuartal di 2009, trahando pa e Renaissance Marina Hotel y Renaissance Beach Suites. Gerente General Paul Gielen a comparti e ocasion cu otro ehecutivonan di e hotelnan, elogiando su ekipo su compromiso di termino largo na hospitalidad y nan fieldad na e propiedadnan di Renaissance den curason di Playa.

Entre esnan celebrando e marca di 5 aña den nan carera tabata Sandra van Wijk, Stewarding; Zenaida Polonia, Cafeteria Marina Hotel; Ricardo Pereira, L.G. Smith’s Steak & Chop House; Felicia Donata, Kitchen; Margarita Hernandez, Main Kitchen; Francis Ras, Main Kitchen ; Geordino Ruiz, L.G. Smith’s Steak & Chop House; Juan Onate, Security; Gladys Dania, Security; Raquel Muyale, Accounting; Vanie Dinzey, Renaissance Private Island; Miroushka Statia, Accounting; Cesar Caradenas, Housekeeping Marina Hotel y Fernando Orihuela, Renaissance Convention Center.

Entre esnan celebrando e logro di nan di 10 aña di carera tabata Vasco Goncalves, Landscaping y Anushka Blom, Security. Entre esnan celebrando e di 15 aña di nan carera tabata Reynold Simon, L.G.Smith’s Steak & Chop House; Robert Kock, Room Service, y Iraida Hernandez, Blue Bar.

Zoyla Croeze y Sharron Wilson, ambos di e departamento di Accounting, a wordo reconoci door di nan coleganan y door di e miembronan di gerencia pa nan binti aña di servicio, despues di a dedica dos decada di nan bida na e compania.

Aki por mira e ceremonia di reconocemento na Renaissance Convention Center.

ORANJESTAD/LOS ANGELES – Diabierna Minister Otmar Oduber tabata di bishita na City Hall na Los Angeles caminda el a topa cu tur e Council Members y nan Presidente.

Minister Oduber a wordo ricibi grandemente dor di tur e miembronan y inclusive el a hiba palabra na City Hall, algo cu sin duda tabata un honor pa nos mandatario.

Riba potretnan por mira Minister Otmar Oduber cu Senator Nate Holden, Council Member Tom LaBong y Council Member Hon Jan Perry.

Awe diasabra Minister Otmar Oduber lo ta biahando pa New York caminda el lo prepara pa e gran dia, dialuna caminda lo tin presentacion na dos di e canalnan mas grandi di Merca, manera ta CBS y NBC.

Sigur un gran trabou di Minister Otmar Oduber den mercadeo di nos isla.

ORANJESTAD/ LOS ANGELES -Na e momentonan aki Minister Otmar Oduber ta na Merca caminda ta promocionando e promer Aruba International Film Festival, mercadeando nos isla y tambe presentando su vision y plan strategico na ATA continente Americano.

Manera ta conoci caba, e famoso actor Richard Gere a confirma su presencia na Aruba pa e festival di cine y esaki a conduci cu e atencion pa nos isla a bira mucho mas grandi.

Promer cu a biaha Minister Otmar Oduber a informa prensa local tocante e presentacion cu lo bay tin dialuna mainta na CBS durante su ‘Early Show’, pero awor e grato noticia a drenta cu “The Today Show” di NBC tambe lo dedica un segmento na Aruba.

E cobertura cu Minister Otmar Oduber ta logrando na Merca den medionan di comunicacion ta algo cu den pasado no a wordo mira y ta un forma grandi di promociona nos isla den exterior.

Ya caba na Los Angeles nos Minister di Turismo a wordo acerca pa un cantidad di prensa specializa den turismo y tambe dor di un otro cantidad di prensa, fuera di e cobertura gigantesco cu e Aruba Internacional Film Festival ta hayando. Awor dialuna mainta, dia 1 di maart, lo por spera cu Aruba su nomber lo rezona di costa pa costa na Merca na momento cu CBS y NBC nan shownan di mainta presenta e segmentonan riba Aruba.

E presentacion na CBS lo cuminsa pa 8:15 ora di Aruba y por spera un parti special relaciona cu nos cultura carnavalesco pa 9:30.

Pa loke ta NBC e presentacion lo inicia pa 11:50 ora di Aruba.

Despues di esaki e presentacion di e gruponan di baile lo tuma lugar na Time Square unda cu e exposicion di Aruba na New York lo ta uno grandisimo.

Di e forma aki Minister Otmar Oduber ta demostrando cu na momento cu e biaha pa exterior, resultadonan positivo por wordo mira. Ya caba por a wak cu despues di su biahe pa Hulanda KLM a bolbe nos isla, despues di su biahe pa Miami Carnival ta regresando atrobe y awor cu su biahe pa Los Angeles y New York lo por spera cosnan sumamente positivo pa nos isla den futuro hopi cercano.

 ORANJESTAD- Gobierno di Aruba den presencia di Prome Minister Mike Eman, Minister Mike de Meza hunto cu e general manager di Valero pa Aruba sr. Ray Buckley a tene un conferencia di prensa pa informa pueblo di un otro fase di progreso den esfuersonan haci pa crea un miho situacion pa e posicion di Valero.

Prome Minister di Aruba Mike Eman a splica cu na luna di januari ultimo gobierno a firma un “memorandum of understanding” cu Valero y for di e acuerdo aki gobierno y dirigentenan di Valero a sigui traha duro riba e palabracionnan haci den e “mou” aki riba areanan general riba cua partidonan a concorda.

Resultado di e deliberacionnan aki ta cu a yega na un “settlement of agreement”. Esaki mester haya aprobacion ainda di Parlamento di Aruba, pasobra e ta regarda cambionan di leynan cu mester tuma lugar. E settlement of agreement aki ta encera den lineanan grandi cu e BBO di 1% riba productonan di exportacion lo wordo elimina. Esaki semper tabata un problema grandi cu Valero tabatin y cu entre otro a haci cu Valero a dicidi di sera su portanan na 2009. Tambe Valero lo paga 7% pa aña na impuesto di ganashi. Ademas a yega na e areglo cu si Valero gana of perde placa cu e refineria lo paga tog un minimo di 10 miyon dollar na impuesto di ganashi pa aña. Pa otro refineria esaki lo ta un minimo di 15 miyon dollar pa aña. A yega na un compromiso cu Douane pa loke ta reglanan di importacion. Tur esaki ta crea un clima hopi mas positivo y un posicion mas fuerte di negocia pa Valero por sea restart e compania, bend’e of buska un partner pa sera un joint venture pa sigui opera e refineria. Mescos tambe a yega na un convenio cu Valero en cuanto pago di grondbelasting cu ta algo nobo pa e refineria. Valero ta bai paga 1,2 miyon florin pa aña na grondbelasting. Hunto cu e suma di winstbelasting esaki ta yega na 20 miyon florin pa aña minimal den caha di gobierno.

Prome Minister a splica cu semper cu tabatin un potencial cumprado pa e refineria, tabatin pregunta y inquietudnan riba BBO, asuntonan fiscal etc. Cu e “settlement of agreement” aki e conmocionnan aki no ta hunga un rol mas y ta haci e posibilidadnan pa Valero mas grandi ora ta negocia cu un cumprado of un partner. Asina Valero tin claridad y Aruba tin claridad. Esaki sin duda ta un logro grandi.

Prome Minister tabata masha satisfecho di por a anuncia cu e suma di placa cu Valero mester paga gobierno cu tabata 200 miyon florin y cu a bira 210 miyon pronto tambe ta bai wordo deposita riba cuenta di gobierno.Un suma di placa hopi necesario, sigur si tene na cuenta e situacion financiero nada bon cu e gobierno aki a bin haya su mes confronta cu ne ora a tuma gobernacion over aña pasa. Ex prome Minister Oduber semper bai tabata bin televisio, radio y den corant pa bisa cu e placa aki ta den yega. Realidad ta cu e suma grandi aki di placa por a tarda te tres aña prome cu e por a drenta caha di gobierno. Valero, dor di tur sorto di maniobra legal por a demora e proceso aki ta cu tres aña. Ta dor di e bon relacion cu Prome Minister Mike Eman y henter su Gabinete a sera cu Valero cu a yega na e bon comprondemento pa pasa e placa aki pa gobierno. Otro gran logro.

Minister Mike de Meza y sr. Ray Buckley di Valero tambe a hiba palabra.

ORANJESTAD- Aki nos por  aprecia un bista bunita di nos  dushi isla di Aruba. Ban nos tur  conserve pa nos futuro generacionan.

Mensahe di Aruba su turismo.com

ORANJESTAD – Minister di Enseñansa y Husticia mr.drs.Arthur Dowers ta hopi ocupa den e dianan aki bishitando diferente scol na Aruba pa asina papia cu e docentenan, scucha na preocupacion, tende di nan kico nan kier mira otro y cambia den enseñansa en general y nan nan scol en particular. Mester bisa cu unda cu Minister Dowers a yega, e recepcion tabata tremendo. Tanto di parti di e team di maestro como di e alumnonan.

Na St.Filomena College MAVO tabatin un “ontvangstcommite” consistiendo di dos hoben wardando na porta riba Minister Dowers. E acogida na e scol secundario aki tabata sublime. Minister a haya un rondleiding dor di e cabesante meneer Lampe, kende tin ya ocho aña ta ocupa e funcion responsabel ey. E scol tin 310 alumno, 16 localidad, 13 klas y 22 maestro.Despues di e rondleiding Minister y esnan cu a compañe riba e bishitanan aki a wordo ricibi den oficina na unda Minister tabatin un encuentro ameno cu e docentenan. Nan a haci minister algun pregunta y a splica kico nan kier pa nan scol. Filomena College MAVO ta un scol masha bon manteni cu airco den tur local y no tin problema di vandalismo. E scol tin cacho, trali dilanti tur benta y porta y tambe tin un sistema di alarma. Loke cu e scol tin hopi mester di dje ta un lugar pa e alumnonan por haci deporte. Minister Dowers a tuma nota di esaki y a bisa di lo laga su oficina wak kico e posibilidadnan ta pa yuda e scol den esaki. Na Filomena College MAVO Minister Dowers a topa cu meneer Altman, un docente kende a yega di dune les. Riba e fotonan por mira Minister hunto cu e docentenan, algun alumno y tambe un meneer Altman.

Despues di Filomena College MAVO Minister Dowers a sigui pa Commandeur Pieter Boerschool. Tur e muchanan di e scol basico aki hunto cu nan maestronan a para dilanti den e hal pa asina saluda Minister na su yegada. Nan a canta, a saka man pa saluda minister y a compañe hunto cu e cabesante rond riba tereno di scol. E cabesante di e scol meneer Franklin Priam a splica Minister Dowers cu e scol tin 262 alumno, 12 local, 6 klas y tambe e scol tin un Prisma klas. Na e scol aki tabatin un mucha cu a haci aña. Taisha Carti a cumpli 9 aña y el a ofrece minister un saco cu coi dushi. Un gesto cu Minister a aprecia masha tanto mes.