ORANJESTAD -Luna di october ta den porta y asina tambe e inicio di e high season di temporada crucero, cual ta bay conoce un record den e cantidad di bishitantenan pa nos isla.

Minister Otmar Oduber ta sumamente orguyoso di por bisa cu Aruba lo conoce un crecemento di riba 20% pa loke ta turismo crucero na 2013. Nos isla den su mihor temporadanan a yega te na 600 mil turista y pa 2013 ta pronostica cu nos lo conoce un cantidad di turista crucero di riba 700 mil, algo cu ta hopi positivo pa nos isla.

“Pami e ta un satisfaccion grandi  mi ker felicita ATA y APA, como tambe tur esnan cu a traha y contribui pa cu un meta cu nos a pone nos dilanti un tiki menos cu 3 aña pasa. Nos a plantea e vision di nos Promer Minister y Gobierno aki pa loke ta nos centro di ciudad, loke e ta bay bira y loke e por ofrece e barconan. E vision aki a culmina recientemente cu un bishita cu hopi elogio di FCCA na Aruba. Nos ta bay haya no solamente un Carnival cu inicialmente nos a trece nan bek y trece confianza bek pa nan tey den temporada abou, pero nos a convence Royal Caribbean cu ta un di e companianan mas grandi y tambe Pullmantur cu ultimo biaha cu a bishita nos isla tabata na 2009. Di mi parti un alegria, un satisfaccion y mita felicita pueblo di Aruba y sigur centro di ciudad y comercio di centro di ciudad”, Minister Otmar Oduber a duna di conoce.

E logro aki a bin danki tambe na un cooperacion estrecho y bon relacion cu e partnernan local como internacional. Diferente reunionnan, encuentronan y bishitanan a tuma lugar y awe nos por cosecha e bon resultadonan di esaki. Pero e trabounan no a caba, esfuerzonan mester continua pa engrandece mas ainda nos industria di turismo crucero y pa tal motibo otro siman Minister Oduber lo ta presente na Corsow pa e conferencia di FCCA, pa cual a prepara duro y caminda lo probecha pa estrecha ainda mas e lazonan cu e companianan crucero y sigui traha riba desaroyo positivo di nos industria crucero.

E mandatario tambe a probecha e ocasion aki pa felicita ATA cu e iniciativa di a bin siman pasa cu un training pa tur esnan relaciona cu industria crucero pa yudanan prepara na e mihor forma posibel pa e temporada cu ta den porta.

Minister Oduber un biaha mas a mustra cu e resultadonan aki ta danki na e bon relacion cu tur e partnernan den e industria. El a expresa cu contrario na loke tabata e pensamento anteriormente caminda hasta a pensa di bay subsidia e fuel di e cruceronan aki, te na e momentonan aki e no ta e caso. “E boluntad di sinta, duna respet y sea un bon partner den e industria a pone cu ni tempo nos tabata papia di Carnival pa subsidia fuel pa nan por yega aki, esey nunca a tuma lugar. Awe ta un pakete di incentivo cu ta wordo hinca den otro di parti APA y ATA caminda ta haci mercadeo conhuntamente cu nan pa percura pa tin business”.

Tur e barconan ta bisa cu Aruba su “yield” (e prijs cu nan por cobra pa un trip pa Aruba) ta pone cu pa nan e trip ta sumamente rendabel, kiermen, nan por pone un prijs riba cual nan ganashi ta mas halto.

Pa loke ta temporada abou di crucero, cual mirando e cifranan no por wordo considera abou mas, ta spera alrededor di 125 mil turista. Aki mester tene na cuenta cu turismo crucero ta hopi importante pa desaroyo economico di Aruba. E ultimo estudio cu a wordo haci dor di APA hunto cu Universidad di Aruba ta mustra cu e impacto di e 125 mil turistanan crucero lo ta uno di riba 30 miyon Florin den nos economia teniendo na cuenta loke e pasaheronan aki ta laga atras na nos isla.

ORANJESTAD – Aruba Tourism Authority ta contento di por informa cu luna di juni 2012 a mustra un crecemento di 7.5% den cantidad di bishitante compara cu juni 2011. Na juni 2011 Aruba a ricibi 67,999 bishitante, mientras cu na juni 2012 a ricibi 73,073.

Esaki den cifranan absoluto ta un diferencia di 5074 mas bishitante na 2012 compara cu 2011, pa luna di juni. Aruba su tres mercadonan di mas grandi a crece den luna di juni cual ta Merca, Hulanda y Venezuela.

Norte America

Bishitante crucero a crece cu 25.8% na april 2012 compara cu april 2011

Recientemente Banco Central a publica cifranan pa luna di april 2012, unda cu a mustra cu e cantidad di pasahero for di barconan crucero a crece cu 25.8% compara cu luna di april di aña 2011, cu ta representa 69.852 bishitante di barconan crucero pa aña 2012.

E cantidad di barconan cu a bishita Aruba pa luna di april 2012 tambe a subi levemente cu 3 barco mas hopi cu april di aña 2011; di 30 barco na april 2011 te cu 33 barco na april 2012.

Cifranan di Banco Central pa turismo crucero ta refleha e maneho y perseverancia di Minister di Turismo, Transporte y Labor, Otmar Oduber kende constantemente ta treciendo su visionnan inovativo dilanti pa sigui engrandece turismo y turismo crucero

For di e mercado di Norte America, cual ta nos mercado principal, Aruba a conoce un crecemento di 5.3%. E mercado di Merca a crece cu 4.1% cual ta representa 1778 bishitante mas cu juni 2012. Esaki ta un crecemento significativo y un di e motibonan cu lo por a contribui na esaki ta cu mericano nan a dicidi di biaha den volumen mas grandi e weekend di 30 di juni, mirando cu e siman ey, “4^th of July Holiday”, lo a brinda e empuhe pa probecha y pega un vacacion durante e siman aki. Esaki ta un posibel conclusion mirando cu mericanonan a biaha mastanto cu aña pasa durante di e ultimo 4 dianan di juni 2012. E hecho cu juni di 2012 tin un diasabra mas compara cu esun di 2011 sigur a hasi un gran impacto riba nos cantidad di bishitantenan tambe for di e mercado aki – y tur otro mercado porsierto. E mercado di Canada tambe a crece den luna di juni cu 42.94% compara cu juni 2011. Esaki debi na e buelonan adicional for di Toronto cu Wesjet.

Europa

E mercado di Europa tambe a produci hopi bon den luna di juni y a crece cu 2.7% lidera pa e mercado di Inglatera cu a crece cu 26.8% cu ta significa 517 mas bishitante. E mercado di Hulanda tambe a bai dilanti cu 0.5% mientras cu Alemania a cai cu 21.2% y paisnan Scandinavia a cai cu 10% compara cu juni 2011. Hopi di e fluctuacionnan aki ta debi na “seizoen” histórico di biaha cu ta aplicabel pa diferente di e mercadonan aki.

Latino America

E mercado di Latino America a crece cu 14.9% compara cu juni 2011. Pa juni e mercado a crece lidera pa Argentina cu a crece cu 60.5% compara cu juni 2011 cu ta igual na 356 bishitante mas. Sigui pa e mercado di Venezuela cu ta sigui produci hopi bon y cu a conoce un crecemento di 25.6% mas bishitante cu na 2011. Den number absoluto esaki ta igual na 1841 mas bishitante. E mercado di Brazil a cai cu 1.9% compara cu juni di 2011 y Colombia cu 4.3%. Tambe ta importante pa menciona cu e capacidad di stul ta limita, cual ta significa cu na momento cu Argentina crece esaki lo influencia e stulnan disponibel di Colombia y Brazil. Ta trahando duro pa bin cu un solución na e reto aki cu posibel buelonan adicional.

Aruba a ricibi den e temporada di januari pa juni 2012 un total di 442,790 bishitante cu ta representa un crecemento di 2.2% di januari pa juli 2011, compara cu e mesun periodo aña pasa na unda un cantidad di 433,172 bishitante a bishita nos isla.

Un indicacion di calidad di turista cu Aruba ta atrae ta door di midi e prijs cu e turista ta paga pa cada camber pa persona, e “Average Daily Rate” (ADR). Hopi importante ta e combinacion di por mantene un ocupacion halto sin mester di afecta prijsnan di camber. Esaki ta significa cu REVPAR ta e indicador di mas importante na unda cu prijs ta un di e elementonan significativo. Segun AHATA pa luna di juni ADR a subi cu 4.6% di $157.53 na juni 2011 pa $164.81 na juni 2012. E ocupacion di hotelnan a subi cu 3.8% den e luna aki di 67.7% na 2011 pa 71.5% na 2012. E ganashi pa camber, e “Revenue per Available Room” (REVPAR) a subi cu 10.5% di $106.65 na juni 2011 pa $117.85 na juni 2012.

ATA ta orguyoso di e resultadonan aki, cu ta resultado nan di entre otro tur e esfuersonan cu ta wordo hasi localmente y den cada mercado. Esfuersonan ta dirigi continuamente riba hisa e calidad di e bishitante tambe, teniendo na cuenta cu e vision no ta dirigi riba sigui hisa cantidad di bishitante so, pero hopi importante, riba hisa e calidad di locual turismo ta laga atras pa nos isla. E visión ta basa riba un limite pa loke ta trata expansion den cantidad di cambernan, cu lo tin como consecuencia cu asina cu yega e punto di ocupacion optimal di acomodacionan aki na Aruba den tur luna, e isla no lo por crece na e mesun manera den cantidad mas. E crecemento na e momento ey lo mester ta den calidad pa asina por sigui ricibi mas ingreso pa medio di nos industria turistico pa e isla. Esaki ta parti di un di e visionnan pa cu turismo di Aruba.

Retonan lo tin sigur pa e aña aki especialmente pa e mercado di Merca, cu a conoce un crecemento fuerte den juni si. ATA conhuntamente cu partnersnan ta trahando duro pa combati “softness” cu lo por presenta den diferente mercadonan. Presupuesto adicional a wordo aloca pa asina boost unda ta necesario e aña aki. Ta contento cu ta mira resultadonan sumamente fuerte, den forma di un crecemento di 7.5% den juni, cu ta un luna cu mester empuhe.

ORANJESTAD -Recientemente durante un entrevista cu Michelle Paige, Presidente di Florida Caribbean Cruise Association (FCCA), el a indica cu Aruba semper a sa di ta un bon partner pa e industria di crucero, y cu e ta sumamente orguyoso di ta na Aruba  pa asina e por mira e desaroyonan cu Aruba ta pasando aden cu lo habri portanan pa mas proyecto y barconan crucero.

Michelle Paige a indica cu e infrastructura nobo di Aruba lo haci posibel cu barconan nobo  lo bishita Aruba, ya cu e inversionnan den infrastructura lo haci di Aruba un atraccion mas grandi ainda. Loke ta sumamente importante ta cu e tram lo duna pasaheronan di edad halto y esnan cu disabilidad, e oportunidad di baha for di barco y disfruta di Caya Grandi, algo cu no ta posibel na hopi isla den Caribe. Ademas di esaki e tram y e desaroyonan cu Aruba ta pasando aden, entre otro den Caya Grandi ta haci di Aruba un “wow factor”, cual lo sigura cu bishitantenan no solamente lo bolbe bishita Aruba via barco crucero sino tambe, lo bin por medio di avion pa un estadia mas largo, cual lo contribui mas na economia di Aruba.

Durante su bishita Presidente di FCCA a indica cu lo mira e posibilidadnan pa trese mas barco crucero pa Aruba, specialmente durante e lunanan di zomer, cual ta Aruba su “off season”.

Michelle Paigea elogia e trabou cu Gobierno di Aruba ta haciendo den Caya Grandi y a mustra cu esaki sigur  ta un “wow factor” pa tur e bishitantenan.

ORANJESTAD -Awe Royal Caribbean International lo ta anunciando e lanzamento di nan barco crucero Vision of the Seas den un serie di cruceronan mas largo den Caribe y Canal di Panama pa e temporada di winter 2012-2013 y Aruba lo ta parti di dje.

Manera ta conoci aña pasa Minister Otmar Oduber a reuni cu ehecutivonan di diferente lineanan crucero na Merca, entre nan Royal Caribbean International, caminda a papia riba e diferente proyectonan y plannan pa futuro, logicamente promocionando Aruba como un puerto pa cu e diferente cruceronan.

Su maneho semper a bin ta pa traha no solamente pa presente, pero tambe planifica y logra cosnan grandi pa futuro y bishita di e crucero aki ta un logro mas no solamente pa Minister Oduber, pero pa henter Aruba

Awe por mira cu e maneho di Minister di Turismo, Transporte y Labor ta sigui duna su frutanan. Despues di e regreso di Carnival Cruises, aumento di turistanan crucero, awor por bisa orguyosamente cu pa e temporada crucero 2012-2013 Aruba lo tin un total di 5 calls di e crucero Vision of the Seas.

E barco aki ta carga un total di 2 mil pasahero, lo cual ta encera un total di 10 mil turista adicional cu lo ta bishitando nos isla, banda di e tripulacion. Pa economia di nos isla esaki ta algo hopi positivo mirando cu e turista crucero ta laga un promedio di 100 dollar atras durante nan estadia di un dia na Aruba.

Minister Otmar Oduber ta sumamente satisfecho cu e anuncio aki y ta gradici tur esnan cu a colabora pa haci e callnan di Vision of the Seas na Aruba posibel.

<iframe width=”420″ height=”315″ src=”http://www.youtube.com/embed/uqvB3HE2Sfc” frameborder=”0″ allowfullscreen></iframe>

ORANJESTAD -Temporada di crusero pa Aruba a cuminsa y pa Parke Nacional Arikok esaki tambe ta e caso. Diahuebs 6 oktober De Palm Tours a trese e prome grupo di 14 persona di e barco Emerald Princess pa un caminata den Cunucu Arikok. E grupo ta consisti di turista Mericano y di Suecia. Salvador Franken tawata encarga cu e caminata aki, y e bishitantenan a keda masha contento di e servicio duna pa sr. Franken.

ORANJESTAD/ WILLEMSTAD -Den kuminsamentu di sèptember ministernan di paisnan parti sur di Karibe ku ta partisipá den un proyekto di krusero nobo lo ta na Kòrsou pa asisití na un kumbre. Segun minister Abdul Nasser el Hakim, intenshon di e reunion aki ta pa yega na un plan konkreto ku lo duna turistanan ku ta bishitá un di e paisnan den region opshon pa bishita otro paisnan den e área ku boto òf avion. Banda di esaki e proyekto lo habri posibilidat pa importá berdura for di paisnan den region pa un preis mas abou.

ORANJESTAD – Minister Otmar Oduber kende na e momentonan aki ta na Merca a logra un otro mehoracion pa loke ta trata nos turismo, den e caso aki turismo crucero.
Manera ta conoci na 2010 Carival Cruise Lines a regresa Aruba despues di un ausencia largo, esaki despues di conversacionnan entre Gobierno di Aruba y ehecutivonan di e linea crucero. Asina na 2010 Aruba a conta cu un total di 5 calls di Carnival Miracle cu un total di 2300 pasahero pa cada call, y aproximandamente mil miembro di tripulacion. Efecto di e regreso di Carnival tabata bisto den comercio, caminda por a mira sonrisa riba cara di e bendendornan un biaha mas.

Miracle a continua na 2011 cu un total di 9 calls cu a representa solamente na pasahero un total di 19,160 persona cu a baha na nos puerto, conoce nos isla y gasta den nos economia di un of otro forma Esaki banda di otro 9 mil miembro di tripulacion, yegando asina na rond di 28 mil bishitante.
Awor durante e biahe di Minister Otmar Oduber na Miami pa reuni cu ehecutivonan di Carnival, por bisa cu un biaha mas por mira un logro di e mandatario. Na 2012 Aruba lo conta cu un total di 23 calls di Carnival, pero no ta solamente e aumento den e calls, pero tambe lo bin cu barconan cu capacidad di pasahero mas grandi.
Asina lo tin un total di 6 calls di Miracle cu capacidad di 2300 pasahero, 8 calls di Freedom cu capacidad di 2974 pasahero, 7 calls di Valor cu capacidad di 2974 pasahero tambe y finalmente e barco cu lo wordo inaugura na juni 2012 Carnival Breeze cu lo tin 2 calls na 2012 y cu tin un capacidad di 3700 pasahero. Calculando e cantidad di pasahero crucero cu Aruba lo ricibi solamente via Carnival na 2012 ta di 56,400 persona. Si añadi e miembronan di tripulacion na esaki ta yega na un total di alrededor di 80 mil bishitante cu Aruba lo ricibi danki na Carnival.
Minister Oduber ta hopi satisfecho cu e logro aki specialmente si tene na cuenta cu 10 di e 23 callnan cu Carnival lo tin na 2012 lo tuma lugar den zomer, temporada cu pa motibonan strategico e companianan crucero ta retira Caribe for di nan itinerario y ta manda nan barco pa Europa y Asina. Esey ta un indicacion grandi di e confianza cu Carnival ta poniendo den nos isla y den Gabinete Mike Eman.
Como si fuera poco, banda di e aumento di bishitanan di Carnival, bishitanan cu barconan mas grandi y den temporada di zomer, Minister Oduber tambe a logra pa e barconan keda pa un tempo mas largo. Awor en bes cu nan ta bandona Aruba pa 4or di atardi, nan lo keda te 11:30 di anochi, dunando asina mas espacio pa e turistanan crucero por disfruta mas di tur e atraccionnan y actividadnan cu nos isla tin pa ofrece, y naturalmente e espacio pa nan por laga mas atras den nos economia.

Palm Beach – Recientemente un grupo di 130 ehecutivo profesional di Colombia, Sur America, a haci un bishita delicioso na Amazonia Churrascaria. E grupo a baha for di un barco crucero den e waf na Oranjestad, a subi busnan airecondiciona pa un gira di e isla y a conclui e bishita alegre na Aruba cu un lunch na Amazonia Churrascaria. Adventure of the Seas, un di e barconan faborito di Royal Caribbean, a bishita Aruba e siman aki, y De Palm Tours a yuda facilita e tremendo experiencia aki. Aki por mira e bishitantenan disfrutando di e tremendo cuminda den compania fantastico na Amazonia Churrascaria.