ORANJESTAD -Diabierna 19 di Augustus 2011 mainta a tuma lugar un conferencia di prensa na Colegio EPI caminda cu directora general señora Undina Harms a duna informacion amplio di apertura di aña escolar nobo y e ultimo desaroyonan riba tereno di enseñansa na dicho scol.
Colegio EPI ta sigui crece cada aña cu mas studiante. E aña escolar nobo ta conta cu 1878 studiante. Unidad Hospitality & Tourism ta conta cu 395 studiante, Unidad Salubridad & Servicio 477, Unidad Economia 521 y Unidad Ciencia & Tecnologia 485.
E aña aki ta uno cu hopi cambio positivo pa Colegio EPI. Manera ta conoci, e projecto di EPI, financia pa FDA, ta uno andando desde aña 1997. E aña aki e projecto ta yegando su fase final cu e apertura oficial di e Open Leercentrum. Apesar di hopi contratiempo, cu a tarda e finalisacion di e projecto EPI en general, a logra di termina cu parti di e ultimo fase pa asina ofrece e studiantenan tur e servicionan pa por ta mas exitoso den nan estudio.
E edificio di Unidad Ciencia & Tecnologia, antes Conrado Coronel, a wordo renoba pa di dos biaha caminda cu mester a hasi diferente trabownan grandi na e dak y sistema di coriente. E Auditorium tambe a haya un face-lift. Dentro di corto tempo lo hasi entrega di e tur e trabownan.
Den e proximo lunanan lo finaliza e instalacion di airco den 14 lokaal. Esaki lo nifica cu pa januari 2012 tur klas di Colegio EPI lo dispone di airco. Colegio EPI lo ricibi pronto un bus cu capacidad di 25 persona, cu lo wordo uza pa excursion pero primordialmente pa transporte di studiantenan durante oranan di ‘bewegingsonderwijs’ na diferente sitionan di deporte na Aruba.
Projecto di seguridad
Durante añanan anterior Colegio EPI tabata tin personal di seguridad solamente pa e parti di anochi, pero ta contento di por bisa cu e aña escolar aki a habri cu personal di seguridad 24 ora pa dia.
Teniendo cuenta cu e populacion di Colegio EPI y tambe tur e otro scolnan cu ta haci uzo di e facilidad y lokaalnan di EPI manera Openbare Avond Leergangen Aruba OAA (Avond Mavo y Beroepsonderwijs), Enseñansa pa Empleo y pronto Middag Havo, ta di suma importancia pa bin cu un plan di seguridad extenso, pa asina segura tur studiante y personal un seguridad continuo riba campus. E plan aki ta encera entre otro cu lo sera tur entrada di campus y laga uno so habri. Tambe lo introduci un carchi di identificacion pa tur studiante y personal. Colegio EPI lo haya financiamento pa cu esaki di FDA via un ‘Beveiligingsplan’. Esaki tambe lo ta e ultimo fase pa finalisa cu e projecto EPI.
Structura di guia
Otro cambio integral cu a wordo introduci e aña aki ta cu a formalisa e uso di formularionan di Intake, caminda cu lo documenta informacion di tur studiante nobo cu drenta EPI. Pa e studiantenan di tweede, derde y vierde lo sigui cu ‘voortgangsgesprekken’. Meta di esaki ta pa duna e studiante mas atencion individual y guia durante nan estudio na EPI. Di e forma aki Colegio EPI ta eleva su nivel di calidad di guia.
Innovacion den enseñansa
Colegio EPI ta pro activo y ta asumi su responsabilidad pa traha riba e curriculo di ‘Taal en Rekenen’ pa asina cumpli cu exigencianan di MBO na Hulanda. Pa cu esaki e aña aki lo introduci un maneho di idioma. Studiantenan di prome aña lo hasi diferente testnan di idioma Hulandes pa diagnostica e nivel na entrada. Studiantenan cu un deficiencia lo haya guia directo di un Remedial Teacher (RT). Esaki tambe ta algo nobo pa Colegio EPI cu desde e aña aki ta conta cu 5 Remedial Teachers, kendenan recientemente a caba nan estudio di RT na IPA-Fontys Hogeschool. Otro aña lo cuminsa cu e testnan aki di ‘Rekenen’ y tambe lo ofrece ‘remediëring’ pa esnan cu deficiencia.
Tur esaki ta parti di innovacion di Colegio EPI pa keda na nivel internacional. Na aña 2013 tur scolnan di MBO na Hulanda lo introduci e asina yama Reken- en Taaltoets caminda cu tur studiantenan mester por pasa cierto testnan pa por wordo admiti na un HBO na Hulanda.
E aña aki Colegio EPI lo sigui cu e innovacion den enseñansa profesional intermedio ariba terreno di Competentiegericht Leren. Compententiegericht Leren lo drenta na vigor como exigencia na Hulanda na aña 2012.
Tambe Colegio EPI lo introduci ‘Eerder Verworven Competenties’ (EVC). Pa cu esaki lo introduci 2 pilots na opleidingnan di Hospitality & Tourism (IE) y Ciencia & Tecnologia (EMSI).
Open Leercentrum OLC
Na oktober proximo e Open Leercentrum (OLC) di Colegio EPI lo hasi su apertura oficial. E OLC ta e ultimo fase di e campus di EPI cu lo brinda diferente servicio primordialmente na studiantenan y personal di EPI.
E OLC di EPI, aparte di ta un edificio grandi y moderno, ta un area especificamente diseña pa crea un ambiente di estudio positivo, caminda cu studiantenan por (siña) studia independiente. Tin diferente area di trabou den e OLC caminda cu studiantenan lo por traha ariba nan proyecto di scol sea den grupo of individual.
Tambe tin oportunidad pa hasi sondeo via Internet y mediatheek. Esakinan tur por sosode segun necesidad bou guia di docente pero tambe ariba nan mes.
E OLC lo ta disponibel pa despues di scol of ora di pauze y den oranan liber, e studiante por hasi uso di e facilidadnan pa traha huiswerk of studia un cierto materia sea online (e-learning) of via materialnan y bukinan di e OLC.
E OLC lo fungi como centro di reunion caminda lo por duna conferencia y cursonan na docentenan y empleadonan di Colegio EPI.
Lo hasi uso di e edificio di OLC tambe pa ofrece e siguiente servicionan na studiante: un reproruimte caminda studiantenan lo por busca nan diktaten y hasi copia, bind in verslagen y cumpra diferente articulo di scol, un stagebureau caminda lo yuda studiantenan haña nan ‘stageplek’ y un ‘loopbaanbegeleidingcentrum’ pa yuda studiantenan cu nan escogencia di estudio superior.
E OLC ta habri tur dia di 7.30 di mainta pa 5.00 di atardi y entrante september lo ta habri te cu 9.00 di anochi pa asina duna tur studiante di EPI e oportunidad pa studia despues di scol.
Retonan
Manera cualquier scol, Colegio EPI tambe tin su retonan. Colegio EPI ta kere den e importancia pa inverti continuamente den docente y personal. Na mes momento ta encontra dificultad tur aña pa encontra docentenan cu Tweede Graads diploma. E aña escolar aki mes tin diferente vacatura manera docente di Hulandes, Wiskunde y Werktuigbouwkunde cu no a wordo yena.
Un otro reto ta e capacidad di scol. E edificionan di Colegio EPI a wordo diseña cu un capacidad di 1500 studiante pero cu ultimo añanan a haya un crecemento di casi 400 studiante. Den futuro lo mester amplia e facilidadnan cu mas lokaal di praktijk y theorie y tambe docentenwerkruimten, pa asina por acapara e crecemento.
Un edificio hopi importante cu a cay afor di e projecto di EPI door di falta di finanzas ta un compleho deportivo. Esaki sigur ta algo cu ta hopi valioso pa un scol asina grandi manera EPI, pa por ofrece na su studiantenan e oportunidad na scol mes pa hasi deporte.
Estudionan nobo
E aña aki lo sigui traha pa cuminsa cu varios opleiding nobo manera Verslavingszorg, Huisarts Assistente, ICT, F&B service (IE), International Tourism y EMSI.
Colegio EPI ta spera pa medio di e innovacion nan menciona di sigui cu su tarea di forma profesionalnan cu personalidad pa sigui engrandece e comunidad Arubano.
