ORANJESTAD -UNOCA ta extende un cordial invitacion na comunidad di Aruba pa un ‘Dia di Buki na UNOCA’
Dia iadomingo, 15 di augustus 2010
Lugar : UNOCA, Stadionweg 21
Ora : 10:00or di mainta pa 2:00or di merdia
E programa pa e ‘Dia di Buki’ ta lo siguiente:
10:00 Porta di UNOCA ta habri pa publico
10:30 Lesamento di buki y contamento di storia pa mucha (hende grandi sigur bon bini). Lo coopera: Minister Michelle Hooyboer-Winklaar, sra. Olga Buckley y sra. Desiree Correa.
11:30 Informacion di parti di UNOCA. Lo tin oportunidad pa haci pregunta.
12:00 Pauze
12:30 Compartimento di experiencia y tips. Lo coopera: Sr. Frank Williams, sr. Ernesto Rosenstand, sr. Marco Christiaans, sra. Sheila Werleman y sra. Lilly Velasquez.
13:30 Declamacion di Poesia. Lo coopera: Sra. Munye Oduber-Winklaar y Sra. Ruthy Vrieswijk-Bergen.
Moderadora pa e dia aki lo ta señora Olivia Figaroa di Biblioteca Nacional Aruba.
UNOCA ta gradici tur persona y instancia cu ta duna nan cooperacion pa e dia aki y ta spera cu e dia aki cai na agrado di un y tur. Ta spera tambe cu e ‘Dia di Buki na UNOCA’ lo ta e comienso di un actividad cu lo sigui crece, caminda cada bes mas y mas persona of instancia haya e oportunidad di duna nan cooperacion y comparti nan experienca na bienestar di desaroyo cultural di Aruba.
Pa mas informacion, por tuma contacto cu UNOCA, sra. Margriet Lee-Tromp Coordinadora di Proyecto, na telefon 582-0108 of e-mail na mlee.unoca@gmail.com. E oranan di oficina di UNOCA ta di 8:30or – 12:00or y13:00or pa 17:00or.

ORANJESTAD/SANTO DOMINGO -Instituto Pedagogico Arubano (IPA) y su Centro di Investigacion y Desaroyo di Enseñansa (CIDE) a participa den e siman di 6 pa 12 di juni na e conferencia anual di ACURIL cu a tuma luga na Republica Dominicana. Un delegacion di 12 participante di Aruba di diferente biblioteca y institucion di investigacion local a biaha pa Republica Dominicana pa comparti conocemento y saca cara di Aruba na e conferencia prestigioso aki den Caribe.

Instituto Pedagogico Arubano a manda su profesional di informacion, sra. Ingrid Gietel di Biblioteca di IPA. Tambe a participa dos specialista riba tereno di idioma y investigacion di IPA, cualnan ta drs. Mirto Laclé (linguista y literato) y drs. Merlynne Williams (Centro di Investigacion y Desaroyo di Enseñansa). Drs. Mirto Laclé a presenta su estudio haci riba diferente tereno di Papiamento den e charla titula “El Papiamento, la lengua criolla de Aruba, Bonaire y Curazao; investigaciones basadas en evidencias”.
E hoben linguista y investigado, drs. Merlynne Williams, a presenta un obra academico skirbi den cooperacion cu dos colega di e Centro di Investigacion y Desaroyo di Enseñansa (CIDE) di IPA, esta drs. Régine Croes y drs. Gregory Richardson. E articulo “Towards an evidence based Caribbean community of knowledge: how the Aruban multilingual model may provide a solution” ta trata multilingualismo den comunidad y enseñansa y e importancia di documentacion y publicacion di conocemento tocante region Caribense den diferente idioma. E topico a hala hopi atencion na e conferencia di ACURIL durante e presentacion plenario di drs. Williams y como muestra di e calidad di e trabou aki el a gana e “ACURILEAN STAR 2010” pa excelencia den investigacion.

Cu e premio aki IPA ta demostra cu na Aruba nos tin talento riba tereno di investigacion y cu CIDE ta haciendo un bon trabou aportando na investigacion local y regional riba tereno di enseñansa, idioma y comunidad. Un danki ta bay na FDA pa por a haci e participacion na e conferencia aki posibel, como tambe na Biblioteca Nacional di Aruba cu a acerca IPA pa por participa y por ultimo na e comunidad completo di IPA pa su confiansa y sosten pa cu e team di CIDE.

ORANJESTAD- Recientemente www.arubasuturismo.com a bishita e docente y escritor Evert Bongers na su cas na Spaanslagoenweg.
Esaki ta relaciona cu e buki interesante cu ela pone na disponibilidad di mundo tocante Aruba su Turismo. E buki ta titula Creating One Happy Island The Story of Aruba’s Tourism by Evert Bongers. A tuma Sr. Bongers algun tempo pa jega na lanza e buki aki riba mercado. E buki ta completamente na Ingles y ta illustra cu masha hopi informacion di historia y desaroyo di Aruba su Turismo y tambe hopi foto y estadistica interesante, en particular pa publico y tambe pa studiantenan cu kier profundisa den e topico aki.
Evert Bongers ademas a entrevista algun pioneronan di e industria turistico di Aruba, pa menciona entre otro Sr.Oscar Henriquez ex-gezaghebber di Territorio Inular di Aruba, Sr. Rory Arends ex-director Toeristenbureau na Aruba, Sr. Eduardo de Veer di Meta Corp.,Sr. Micheal Kuiperie ex-deputado di Turismo y varios personahenan mas.
E buki aki ta obtenibel na tur libreria y giftshop na hotelnan y na bong@setarnet.aw .Tambe por bishita e website www.arubadiaruba.aw pa mas informacion.
Nos pabien na Sr. Evert Bongers kende un biaha mas a duna un gran aporte na historia di Aruba.

ORANJESTAD-Interesante ta e workshop cu Ateliers ’89 ta organisando e siman aki cu e Historiador Arubiano Drs. Adi Martis E idioma lo ta Hulandes y Papiamento. E seminario aki ta uno a la Master Class y esaki ta uno tambe cu lo bo no tin cu perde.

DR. ADI MARTIS: DE TODO UN POCO

Redactando mi charlanan pa Ateliers‘89 mi a saca mi topiconan for di e sorto di themanan na cual mi a dedica mi mes ultimo añanan,. E resultado ta un serie hopi varia. Mi ta spera cu e lo ta na boso agrado.

18 mei: Kunst van het “Niet-Westen”: van Primitivisme tot Documenta XI
E serie lo cuminsa cu un charla tocante historia di evaluashon di arte no occidental. Mi lo papia entre otro tocante di obranan di artista europeo cu den fin di siglo diesnuebe y comienso di siglo binti a busca nan inspirashon den arte “primitivo” (entre otro tocante obra di Paul Gauguin, Picasso y Paul Klee), Outsider Art y Art Brut (Jean Dubuffet). Tambe lo mi elabora algun exposicion cu tabata importante pa nan evaluashon, por ehempel Documenta 11 na Kassel na anja 2002.

19 mei: Arte contemporaneo den Caribe I
Dos charla lo ta dedica na arte di Caribe. Esun di prome ta thematico. A base di algun thema cu nos por mira hopi den arte plastico di Caribe, mi lo elabora obranan di artistanan di entre otro Antillas Hulandes, Aruba, Barbados, Cuba, Surnam y Trinidad.

20 mei: Arte contemporaneo den Caribe II
E di dos charla di arte di Caribe lo ta dedica na desaroyonan recien na Antillas Hulandes, Aruba y Surnam.

21 mei: Fotografia y arte plastico
For di envento di fotografia de e prome cuarto di siglo diesnuebe tin un influencia mutuo di e medio nobo aki y e medionan tradicional di arte plastico. E historia ‘ki, for di siglo diesnuebe te awendia ta topico di e charla aki.

24 mei: Fotografia di guera
Fotografia documental ta un di e generonan di e medio cu ta wordo traha for di su envento. Cu algun ehempel di e Geura Civil Mericano, Prome y Segunda Guera Mundial, Guera Civil Spaño i Guera na Vietnam lo mi papia tocante fotografia di guera.

25 mei: Tecnica digital y arte plastico
Nos ta bibando den un “Post-Medium Condtion”, den cual artistanan plastico no ta mara na un medio mas. Tecnicanan digital ta den pleno atenshon. Den e charla ‘ki lo mi trata historia di computer y usamento di technica nobo digital den arte plastico, fotograffia, arte di video y arte cu ta usa internet.

26 mei: Cultura Visual
Como historiador di arte mi no ta dedica mi mes solamente na High Art, pero tambe na Cultura visual, na e manera cu sierto imahennan ta wordo usa den comunidad. Den mi penultimo charla lo mi demonstra e saki cu historia di jeans.

27 mei: Coda
Mi ultimo charla ta habri ainda. Lo mi duna un resumen y dependiendo di mi experensia lo mi trata algun topico.

ORANJESTAD – Minister Otmar Oduber a wordo invita dor di EPI sector Hospitalidad pa atende e presentacion di proyecto final di mercadeo di e studiantenan di ultimo aña.
E studiantenan mester acerca companianan existente y traha un plan di mercadeo pa nan y despues presenta esaki dilanti di publico.
Minister Oduber a haya oportunidad di dirigi su mes na esnan mustrando con e mes tempo e tabata bay Bushiri Hotelvakschool tambe mester a pasa den e proyecto aki. Tambe el a indica e importancia di e scol aki pa futuro di nos isla y con diferente di nos hendenan cu a studia den e ramo aki ta destacando nan mes den diferente area di relevancia.
Akinan e titular di Turismo a enfoca riba e importancia di un estudio, di e dedicacion di e hobennan den nan carera pa dia di mañan tambe nan por sobresali den nan profesion, independiente si ta den area di turismo of no. El a pidi e studiantenan pa sigui y cumpli cu nan metanan y sigui desaroya nan mes pa nan mes y pa nos isla.
Minister Otmar Oduber a keda sumamente impresiona cu e presentacion di e proyectonan dor di e gruponan. Nan, sigur ta demostra cu nos industria turistico ta den bon man. E hobennan a mustra un dominio di palabra grandi, vision y ideanan hopi positivo pa cu mehoracion di e parti di mercadeo cu sigur lo yuda e companianan pa cual esaki a wordo traha.
Na final Minister Otmar Oduber a desea tur studiante hopi exito den nan futuro profesional, sea den turismo of cualkier otro area cu nan escohe pa desaroya nan mes profesionalmente.

ORANJESTAD – Recientemente Aruba Bank a invita alumnonan di Commandant Generaal Abraham de Veer School cu ta den e segundo aña di nan educacion secundario pa un mainta informativo y educativo na e banco.

Esaki tabata den cuadro di inicio di un serie di presentacion dedica specialmente na studiantenan cu ta e segundo aña di nan educacion secundario.
Aruba Bank a presenta un programa varia pa e hobennan, den cual personal di diferente departamento a comparti cu e alumnonan nan estudio, trayectoria y experiencia den banco y na final a duna nan mensahe special na e studiante.
Tambe a duna e studiantenan informacion tocante di algun producto bancario, cual nan por haci uso di dje durante cu nan ta studiante.
Studiantenan tabata tin diferente pregunta cu ta varia entre otro kico tur ta e rekesitonan pa nan drenta den labor na banco y tambe tocante e Cuenta di Studiante, cu ta ofrece un cantidad di beneficio pa nos studiantenan y riba tur e productonan di spar cu ta super bentahoso.
Na final di e mainta e studiante y maestronan a ricibi un paseo den e sucursal principal di Aruba Bank.

Aruba Bank kier duna su aporte na comunidad di Aruba na especialmente na nos hobennan, pa nan sa balor di nan estudio y cu esaki ta un inversion pa nan mesun futuro.

Aruba Bank lo continua cu e programa informativo y educativo aki. Tur scolnan secundario lo ricibi un invitacion pa asisti cu nan studiantenan cu ta den e segundo aña.

ORANJESTAD – The Government’s Department Aruba Cruise Tourism and the University of Aruba’s Faculty of Tourism Studies have joined forces to establish the ‘C.I.A.’ – Cruise Industry Alliance. The C.I.A. is a strategic alliance based on the power of partnership and collaborative expertise to create a competitive and sustainable (cruise) tourism destination.

This partnership taps in to countless opportunities for both the Faculty of Tourism Studies and the Aruba Cruise Tourism (ACT) to benefit from each other. The first scheduled project will be the launch of the Aruba Cruise Profile (ACP) study 2010, in which Aruba’s Cruise Visitor Profile will be analyzed through a survey that will allow the ACT to gain insight into the experiences, perceptions and behaviors of Aruba’s cruise visitors. This collaborative study will allow for quality improvements and will strengthen marketing and promotional efforts.

Graduating students from the Faculty of Tourism Studies will also have the opportunity to do their internship at the Aruba Cruise Tourism Department as part of their senior year project. Students will have the opportunity to receive hands on experience. Likewise, ACT employees will also have the opportunity to take specific courses related to their field of work at the university which will enable them to stay updated and in sync with current tourism trends and practices.

The Faculty of Tourism Studies and the ACT are committed to working collaboratively towards positioning Aruba as a quality, vibrant, and sustainable tourism destination, which will create the tomorrow’s leaders, and work towards the wealth and welfare of our community.

ORANJESTAD – Art Rules Aruba ta un Programa di Arte educacional pa e hubentud di Aruba, cu ta ofrece un programa intensivo di dos siman durante e temporada di Zomer, cu 7 disciplina di Arte, incluyendo Baile, Teatro, Poesia & Rap, DJing & Produccion di Musica, Photografia y Disenjo, Moda y un tayer bonus di Film.

Presenta pa un ekipo internacional di artista, director, productor, DJ, bailarin y actor, Aruba su hobennan lo experiencia un intercambio internacional di Arte cu maestronan procedente di ciudadnan incluyendo Londres, Amsterdam, New York, Washington, Rotterdam, Quebec y naturalmente, di Aruba mes!!

Riba dia 19 di Juli lesnan lo cuminsa cu 250 mucha den e grupo di edad di 14-21, probechando di e oportunidad pa participa, dividi den e siguiente disciplinanan, Baile, 50, Teatro, 30, DJ-ing & Produccion di Musica, 40, Moda 30, Poesia & Rap 40 y film,16.

Registra tur bo informacion, scohe bo disciplina di interes y skirbi un carta di motivacion declarando bo entusiasmo pa e programa y dicon bo kier ta envolvi.

Afortunadamente, un bon cantidad di e maestronan di Art Rules Aruba ta cualifica pa traha cu muchanan cu necesidadnan special, asina ta cu e programa en berdad lo ta inclusivo, y tur hende cu un interes den arte ta invita pa participa.

Lesnan lo tuma luga na tanto San Nicolas y Oranjestad y si bo no ta cai den e edad di e grupo, demasiado hoben of net mas bieu cu 21 anja; no preocupa; Art Rules Aruba tambe lo ofrece oportunidadnan pa bo participa den lesnan maestro den e oranan di anochi y eventonan special durante e siman y den e finnan di siman na varios sitio riba e isla, pa e duracion di dos siman.

Pa mas informacion tocante e programa, e eventonan special of con pa registra, bishita www.artrulesaruba.com of pasa busca un formulario di registracion na bo scolnan local, UNOCA, e Biblioteca Nacional of Cas di Cultura.

Tambe bo por manda un email pa info@pancakegallery.com y ricibi un formulario di registracion cu lo wordo manda na bo persona.

Lesa mas tocante e Pancake Gallery y su movemento riba e blog www.thepancakegallery.blogspot.com