ORANJESTAD – Ayera a tuma lugar e reunion publico den Parlamento pa loke ta creacion di e dos fondonan di turismo, esta e Aruba Tourism Marketing Fund (ATMF) y e Tourism Product Enhancement Fund (TPEF). Por bisa cu e reunion tabata uno hopi positivo caminda a reina un nivel halto y awe por bisa cu Parlamento a aproba e creacion di e fondonan historico aki.
Durante un reunion basta extenso Minister di Turismo, Transporte y Labor, Otmar Oduber a elabora detayadamente riba e diferente preguntanan cu a bin dilanti pa loke ta e creacion di e fondonan aki y e ventaha cu e ta representa no solamente pa turismo di Aruba, sino pa Aruba en general.
Un di e puntonan cu mas a haya atencion ta e independizacion di ATA y su relacion cu e fondonan aki. Aki e titular di Turismo a indica cu desde 1985 a bin ta purbando di logra independiza ATA, cual tambe a wordo confirma dor di ex minister Briesen, kende a indica cu e mes a firma un documento pa haci’e na 1985.
A base di dialogo habri, conversacionnan sincero entre instancianan cu ta representa turismo na Aruba a logra den 9 luna di tempo loke pa 25 aña no por a wordo logra. Na e momentonan aki por bisa cu 100% di hotelnan na Aruba ta den mesun liña di maneho di Minister Otmar Oduber y e creacion di e dos fondonan aki cu sosten total di nan ta un muestra specifico di esaki.
Mas aleu Minister Oduber a indica cu e maneho hiba den turismo te na e momentonan aki ta di continua cu loke tabata bay bon di maneho anterior, pero tambe cu tin otro cosnan cu ta purba di pone un direccion nobo, cual por wordo mira den e 9 lunanan di maneho.
Meta principal di creacion di e fondonan aki ta ta pa garantiza fondonan importante pa Pais Aruba mirando cu turismo ta esun cu ta set e trend pa e maneho hiba como Gobierno. Den e rosea aki Gobierno a pone un enfasis hopi grandi riba e maneho cu mester wordo hiba den turismo. “Nos tur ta para pa e intencion cu tin pa garantiza fondonan pa cu turismo, pa di e forma ey den bon y den malo, e maneho di promociona Aruba por wordo garantiza. Ta trata aki di un maneho cu ta wordo planifica di un aña of mas”.
Pa loke ta e fondo di mehoracion di producto, e placa di e fondo aki lo wordo usa pa mehora diferente aspectonan di nos isla relaciona cu turismo, pero tambe pa mehora e calidad di servicio cu nos ta ofrece na nos bishitantenan.
Tambe por a scucha den e reunion cu ex minister tabata papia di un ATA sui generis, ta aleha e entidad aki for di politicia y ta sigura e fondonan cu ta bay inverti den futuro pa turismo. Aki por bisa cu ex minister di Turismo y actual Minister di Turismo ta cana riba e mesun liña pa loke ta e punto aki y awe despues di casi 25 aña poco, poco ta yegando na loke un Gobierno tras di otro a purba.
E proceso di independizacion ta bayendo cu cooperacion di e tur e departamentonan concerni y Minister Oduber a comparti cu Parlamento cu a involucra un representante di sindicato tambe den e proceso aki, algo cu ta mustra e claridad y transparencia den dje. AIB tambe a wordo pidi pa colabora den henter e proceso aki pa yuda den e diferente facetanan promer cu yega na e meta final di logra un ATA nobo.
Mercadeo nobo di Aruba mester mustra cu calidad di nos isla ta mihor cu esun di nos competidornan, pesey e diferencia di prijs. Mester mustra cu nos no ta baha nos prijs simplemente pa competi, al contrario mester mustra cu nos calidad ta superior.
Minister Otmar Oduber a keda satisfecho cu e sosten di Parlamento pa e creacion di e fondonan aki cu sigur lo contribui cu e engrandecemento di turismo di nos isla.

ORANJESTAD – Den proximo dianan Parlamento di Aruba lo ta tratando algo sumamente importante y historico pa nos isla, e dos fondonan cu lo contribui grandemente na mehora nos Producto Aruba y na mercadeo di nos isla den exterior.
Pa promer biaha a yega na un acuerdo di cooperacion entre sector publico y priva pa uni esfuerzonan pa mercadea nos isla den exterior y pa mehora nos Producto.
Durante añanan largo hopi a purba pa yega na algun tipo di cooperacion, pero esaki no a logra y awe por bisa cu den apenas algun luna Minister Otmar Oduber a logra e acuerdonan di cooperacion aki cu tanto Aruba Hotel And Tourism Association) y ATSA (Aruba Timeshare Association). Cu otro palabra, mundo hotelero na Aruba ta riba e mesun liña di maneho di Minister Oduber.
E acuerdonan aki ta un refleho di maneho di Gabinete Mike Eman cual ta basa riba e dialogo, cooperacion y transparencia. E tipo di maneho aki a logra habri portanan di cooperacion y awendia por mira cu e relacion entre sector priva y publico a mihor cu nunca.
Pero no ta solamente esey, vision di Minister Otmar Oduber pa cu turismo ta conta cu e sosten di mundo hotelero, nan ta wak con e titular di Turismo ta trahando fuertemente pa hiba nos isla na e lugar cu e merece riba mercado turistico internacional.
Na maart 2010 a firma e MOU cu AHATA pa yega na e Aruba Tourism Marketing Fund (ATMF) y na augustus 2010 a firma cu ATSA e MOU pa yega na e Tourism Product Enhancement Fund (TPEF).
Pa loke ta e fondo di mercadeo, esaki lo significa un cambio grandi den e forma cu lo bay mercadea, pasobra den e MOU no solamente ta papia di un fondo independiza y cu mester desemboca den un ATA independiza pa 1 di januari 2011, pero tambe ta encera e confianza di crea un ‘board’ cu tin cu bay hunto entre AHATA y Gobierno.
Den e structura di esaki lo tin participacion completo, habri y structura entre instancianan priva y publico caminda hunto, usando ATA como e vehiculo, lo mercadea nos pais, teniendo e control y supervision den un fase transitorio, ya cu na momento cu ATA bira independiente esaki lo bay pa e oficina di turismo.
Den cuadro di instalacion di e dos fondonan a mira e necesidad pa adapta e tarifanan di room tax, Parlamento, durante un reunion publico den luna di april, a sostene e cambio aki cu un total di 11 voto na fabor y 6 voto contra. Esaki a encera cu entrante 1 di mei e room tax (impuesto pa camber) a pasa di 6% pa 7.5%, es decir un aumento di 1.5%.
Mester bisa tambe cu den mesun cambio aki a keda aproba cu lo conoce un otro aumento, cual inicialmente tabata entrante 1 di juli 2010, esaki di 2%. Es decir e room tax lo yega na un total di 9.5% y esaki lo drenta na vigor asina cu e wordo trata den Parlamento den e proximo dianan.
Minister di Turismo ta pone tur dia hopi prioridad riba Producto Aruba, mehoracion di dje, diferencia nos mes for di competidornan tanto pa e calidad como pa servicio brinda na Aruba, esaki ta forma parti di su vision pa mehora nos turismo.
A base di e vision aki durante e promer reunion cu e tabatin cu ATSA na december pasa, el a bay presenta e idea, pero promer cu el a logra esaki ya caba esnan di ATSA a bise kico nan idea tabata, cual tabata cuadra totalmente cu loke Gobierno kier a crea. Esey ta cu a yega na aumento di roomtax, pero poniendo atencion na percura pa Producto Aruba y su servicio tambe aumenta.
Asina a conclui cu e 2% cu ta bin for di e propiedadnan cu ta time share na Aruba lo wordo separa den un fondo caminda cu un suma equivalente na tur e simannan cu ta wordo opera bou di timesharing, igual na e 2% lo wordo deposita den un ‘begrotings fonds” special cu lo bay specialmente pa mehora calidad di producto y servicio na Aruba.
Ta trata aki di un suma di alrededor di 4 miyon florin cu lo bay tin den un fondo cu no tabata existi antes. Gobierno hunto cu ATSA lo bay supervisa e distribucion di e placa aki a base di cierto acuerdonan cu tin caminda lo mustra den ki direccion e fondonan aki mester bay.
Asina por mira cu den apenas 9 luna di tempo Minister Otmar Oduber a logra yega na dos fondonan sumamente importante pa Pais Aruba mirando cu industria turistico ta nos pilar economico. Un logro hopi importante cu a wordo logra na un maneho habri di dialogo y cooperacion cu e partnernan den turismo y cu awendia ta comparti e mesun liña di maneho cu e mandatario.

Jan van Nes, presidente di ATSA papiando riba Minister Otmar Oduber
“Mi ta kere cu e Minister aki nos ta bek on driver seat di ta e frontrunner den turismo”

Presidente di Aruba Time Share Association (ATSA), Jan van Nes na ocasion di e firmamento di MOU pa establece e Tourism Product Enhancement Fund (TPEF) a indica cu dia 30 di juli algun persona a wordo invita dor di actual Minister di Turismo pa ‘brainstorm’ su nota di discusion en cuanto Turismo y Transporte.
Sr. van Nes ta bisa cu el a haya e nota di Sr. Oduber masha ambicioso y el a haci algun remarke, pasobra e tabata bastante eceptico cu Minister lo logra riba termino corto di yega na un fondo pa salvaguardia e mercadeo di Pais Aruba y tambe cu lo logra un fondo pa e producto.
“Mi tin di felicita Minister cu den menos di 1 aña di gobernacion a logra tur dos. Loke ta haci esaki historico ta cu nos no tabatin un fondo cu realmente ta salvaguardia e mercadeo, loke awor aki si tin, esta e MOU firma cu AHATA. Loke na nos opinion ta mas historico ainda ta cu nos a yega na un product fund, pasobra aunke nos ta papiando di atencion na e producto den plannan di mercadeo di ATA desde 1985 e nunca a materializa, y awor aki nos a volunteer’e. Nos a lese den e plan di maneho y en bes di bringue nos a bay den nos seno y e general managers di time share resorts a bin na un acuerdo”.
Segun Jan van Nes, e time share members ta sinti cu Aruba ta nan cas y nan ta kere cu e cas mester ta na ordo. Ademas, un encuesta cu a wordo teni entre e miembronan ta mustra cu hopi timeshare members no ta mucho contento cu e Producto Aruba y cu e forma con den e ultimo añanan e la deteriora.
“Nos tin tur e confianza cu e proyecto aki lo cana bon. Mi tin cu bisa cu e 2.4 miyon dollar cu nos ta premira cu e fondo aki lo crea no ta loke nos ta sinti ta bay ta e number final. E board di e Tourism Network Fund tin plan di acerca sector priva cu tambe ta biba di turismo, pa nan contribucionnan”.
Continuando el a indica cu Minister Oduber a opta pa ATSA mes bin cu un formula y den e discusionnan interno a sali cu ya cu AHATA ta contribuyendo cu nan 2% den e fondo y cu ATSA nunca tabatin esey, e ora nan tambe lo haci’e.
Esaki no tabata nada facil pasobra pa transient e aumento di impuesto a bay di 6 pa 7.5, esta 25%, pa time share e ta bira casi 58%, promer di 6 pa 7.5 y awor cu ta ‘volunteer’ e 2% e ta bira 9.5.
Jan van Nes ta splica cu e fondonan aki ta algo cu den Caribe no a wordo mira ainda. “Aruba antes tabata un frontrunner, nos a cay un tiki atras dor di fondonan di mercadeo, eseynan ta wordo salvaguardia aworaki dor di Aruba Marketing Fund, a bin acerca e Product Fund, dus mi ta kere cu e Minister aki nos ta bek on driver seat di ta e frontrunner atrobe den turismo”.

ORANJESTAD – Pa basta tempo caba actual Minister di Labor, Otmar Oduber a bin ta expresa cu e ta convenci cu e fenomeno di ‘on call’ ta perhudicial pa e clase trahador. Dor di esey el a tuma e decision cu den e ley laboral nobo lo atende cu esaki caminda lo elimina e fenomeno aki for di mercado.
Lo bay regula e parti di uitzendbureau den un forma mas estricto tambe.
Na e momentonan aki por mira cu tin varios establecimento cu tin trahadornan riba e base “on call”, es decir, ora nan tin mester di nan ta belnan, e trahadornan no ta conta cu un salario fiho y esey cu tur su conesecuencianan economico-financiero pa e famia. Ademas, e trahadornan aki no ta conta cu e proteccion di nos leynan laboral.
Minister Otmar Oduber for di hopi promer cu el a asumi e posicion di Minister, a papia fuertemente contra e fenomeno aki y tambe riba e parti cu mester regula estrictamente e forma di funcionamento di e uitzendbureaus.
Awor e ta asina leu cu e cambionan di ley pa trata e aspectonan aki ta practicamente cla caminda cu lo elimina e concepto di “on call”, caminda e proteccion di e trahador lo ta central. Si un persona por demostra cu pa un termino di 3 luna consecutivo y pa un minimo di 20 ora pa luna el a realiza trabounan pa un otro, ta indicativo cu ta existi un contrato laboral entre e partidonan.
Minister Otmar Oduber a para fuerte pa e cambio aki, el a bisa cu e ta considera e situacion actual uno sumamente desventahoso pa e trahador y no por ta asina cu cierto hendenan por haci wega cu trahadornan, mientras cu e ultimonan aki ta sufri di e consecuencianan tur luna.
“E ta un compromiso cu mi a haci den campaña y ta un compromiso cu mi ta cumpli cune na beneficio di nos hendenan”, Minister Otmar Oduber a duna di conoce.
Pa loke ta trata e situacion di e uitzendbureaus, ta asina cu Aruba lo introduci un sistema moderno cu a keda demostra di a funciona na otro paisnan.
Esaki ta un otro paso tuma dor di Minister di Labor, Otmar Oduber pa traha na beneficio di nos clase trahador.

ORANJESTAD, Aruba – 9 di augustus 2010: Como un incentivo special pa tiendanan situa den Caya Betico Croes y vecindario, Aruba Tourism Authority a anuncia cu lo tin premio special pa e tienda miho decora y mas creativo. Manera ta conoci, ATA ta organisa un evento nacional den Caya Betico Croes riba dia 20 di augustus 2010 for di 6:30PM pa 8:30PM den cual lo devela e imagen nobo di Aruba. Ta encurasha e doñonan di tiendanan den caya grandi pa decora nan vitrinanan specialmente pa e evento aki. ATA conhuntamento cu MAMBO a anuncia durante e conferencia di prensa, cu nan lo premia e tienda y tur su empleadonan den un sorteo special. Di e forma aki ta spera cu den e siman di 16 pa 20 di augustus e tiendanan situa den Caya Betico Croes lo sali mustra nan miho cara, cu colornan di e imagen nobo di Aruba, anticipando nos imagen nobo.

ORANJESTAD -Minister di Turismo, Otmar Oduber durante e anuncio di e lanzamento di e imagen nobo di Aruba cu a tuma lugar diahuebs pasa, a expresa cu e imagen nobo aki lo diferencia Aruba di nos competidornan. E colornan cu ta wordo usa tin un significacion y dentro di poco esakinan lo wordo tresi dilanti y asina cada un di nos por identifica nos mes cu nan. E sentido di orguyo ta hunga un rol hopi importante den henter e desaroyo aki, “e orguyo di sinti nos mes Arubiano”.
Minister Oduber ta indica tambe cu si tin un imagen cu ta uniforma, cu ta standard, cu por wordo reconoci tur caminda di mundo, esaki ta haci cu e balor di e placa cu ta wordo inverti den mercadeo ta bira hopi mas, e yield riba dje, segun calculacionnan lo por yega casi na dobbel di loke e ta na e momentonan aki.
Tambe Minister Otmar Oduber a indica cu decision di Gobierno ta pa crece den calidad y no den cantidad, cu na e momentonan aki tin entre 3 pa 4 proyecto cu ta den pipeline, cual ta cosnan cu e gobernacion nobo a haya nan mes cu nan. Decision ta cu ta anuncia un moratorio pa loke ta hotelnan pabou di brug, esey kiermen cu mester expande den calidad, den servicio di producto cu ta ofrece.
“P’esey mester a defini bo mes pa ta diferente. E imagen nobo di Aruba ta haci cu nos isla ta distingui su mes di otro mercadonan, pa asina por keda uno di un clase y nivel mas halto cu e competidornan”, e mandatario a duna di conoce.
“Cu e imagen nobo y uniforma aki nos lo ta mas productivo, mas eficiente den loke ta haci, percura pa den djele e bira un sentido di bo orguyo, pa cada un cu ta biba riba e pida baranca aki sinti nan mes identifica den e logo aki y e calidad di producto”, el a agrega.
E imagen nobo di Aruba lo wordo lanza localmente promer. Esaki lo tuma lugar den Caya Grandi hunto cu tur esnan cu ta produci mercancianan local, pasobra hunto cu e imagen nobo aki cu lo wordo presenta, Aruba no mester lubida cu nos ta keda un isla den Caribe, nos mester keda cu e caracteristicanan cu un turista ta busca ora tuma un decision di unda e kier bay.
Minister Otmar Oduber: “Antes por ta Aruba ta bunita, hopi santo blanco y hende amabel, nan ta scohe pa bin conoce Aruba. Awor aki tin 20 competidor eyfor cu tin e mesun beach blanco, y por ta no mes amabel, pero ta luchando si pa yega na e punto ey. Bo mester diferencia bo mes e ora ey, percura pa bo tin cultura pa ofrece, percura pa bo tin historia pa ofrece y esey ta loke nos kier trece aden, dunando hopi atencion na esnan cu ta haci artesanianan local. Esaki ta bay man den man cu e intencionnan di converti e otro banda di nos isla, San Nicolas, den e parti cultural historico”.
Mas aleu Minister Oduber a duna di conoce cu hopi biaha por tin un idea y por impone como gobernante, pero tambe por bisa cu ta duna di conoce e idea aki y ta busca un sosten amplio pe. “Esey ta loke nos a bin ta haci desde cuminsamento cu tur e instancianan”. E imagen nobo di Aruba mester envolve tur hende, “nos por a djis warda september ora un Arubiano biaha pa e por wak con Aruba ta wordo presenta awor. Nos acercamento tabata diferente, nos a bisa, laga nos tur como Arubiano ta orguyoso di loke nos ta presenta pa loke ta nos pilar economico, nos turismo. Ora un turista yega Aruba y puntra dicon nos ta presenta nos mes asina, nos por splike”.

ORANJESTAD Diahuebs 5 di Augustus 2010 mainta tabatin un conferencia di prensa na ATA caminda a anuncia e lanzamento di e branding nobo di Aruba.
Minister di Turismo, Transporte y Labor, Otmar Oduber tabata presente pa e ocasion grandi aki, cual el a cataloga como e comienzo di un proceso hopi special no solamente pa turismo di Aruba, pero pa Aruba en general. Esaki debi na e dependencia asina grandi cu nos economia tin na e momentonan aki pa cu turismo.
Intencion ta di no solamente promove Pais Aruba den exterior pa por atrae turismo, pero tambe pa mustra e importancia cu turismo tin pa henter gremio comercial na Aruba, particularmente centro di nos ciudad caminda cu tin henter un proceso andando di renovacion y rehubenecemento cu e proyecto “Bo Aruba”.
“Awe nos ta cuminsa e proceso di duna di conoce e imagen nobo cu poco, poco Aruba ta bay presenta na mundo, un imagen cu pa promer biaha ta wordo uniforma y e ta un proceso caminda cu nos kier involucra pueblo di Aruba den decisionnan asina importante”, Minister Otmar Oduber a duna di conoce.
Mas aleu el a duna di conoce cu nos tin un presupuesto di casi 40 miyon pa mercadeo, pero cu hopi biaha no ta splica na comunidad di Aruba kico ta wordo haci pa por tin un coherencia. “Un coherencia entre servicio comercial, retail, servicionan cu ta wordo duna dor di diferente actornan den industria manera taxista, imigracion, e persona cu ta ricibi e turista na e front desk…Por atrae turistanan cu miyones di dollar den exterior, pero na final di cuenta ta nan experiencia, nan first impression na Aruba, nan last impression na Aruba lo determina pa Aruba continua y mehora ainda e exito cu nos tin den nos turismo na e momentonan aki”, e mandatario di turismo a duna di conoce.
E proceso di di branding di Pais Aruba a cuminsa ya caba for di aña pasa y na momento cu Gabinete Mike Eman a sinta a conversa riba dje y inmediatamente a duna sosten na e iniciativa cu tabatin di Departamento di Turismo. Gobierno actual ta di opinion cu mester uniforma y tin un solo imagen cu ta mustra na e mundo pafor y local pa loke ta trata nos producto.
Maneho di Ministerio di Turismo, Transporte y Labor ta basa primordialmente riba mehoracion di producto y servicio. Esaki lo bira un aspecto crucial den e imagen nobo cu Aruba lo bay presenta despues di casi 25 aña di exito den industria turistico.
Finalizando Minister Otmar Oduber a indica cu durante e ultimo aña tabatin un trabou intenso y detaya y awor Aruba lo por bay presenta su imagen nobo, primeramente na nos propio hendenan cu lo tuma lugar dia 20 di augustus den Caya Grandi den un evento organiza conhuntamente cu Mambo. “Nos ta marcando Aruba con e lo ta den futuro y con lo bo reconoce Aruba tur caminda”.

ORANJESTAD – Despues di cu a sere varios aña pasa porfin awor por mira cu trabaonan di reparacion a inicia na e post di strandpolitie na Palm Beach e sitio aki ta un estrategico pa polis di strand pero cu a ser sera pa trabaonan di reparacion. E paso aki aunke a tarda hopi e ta inspira confiansa cu lo tin seguridad mas cerca y frecuente den e area hotelero. Awor ta camaranan di seguridad mester instala na algun punto strategico y si algun hotel yuda tambe poniendo “feed” (suministro) di nan camara di seguridad exterior por yuda pa asina combati criminalidad den e area hotelero.

ORANJESTAD – Diabierna atardi, Minister di Turismo, Transporte y Labor, Otmar Oduber a organiza un recepcion pa honra e trahadornan publico cu a baha cu pension y a cumpli entre 25 cu 40 aña di servicio.
Mester bisa cu e atardi aki na di dos piso di Centro Hadicurari tabata uno hopi ameno caminda tur e trahadornan y nan famia a sinti nan mes valora pa e trabou cu nan a bin ta haciendo na servicio di comunidad pa asina tanto aña.
Minister Oduber a indica cu un parti integral di su maneho ta pa pone atencion riba e parti humano di e hendenan cu ta yuda den e proceso di ehecuta maneho di Gobierno. Asina el a tuma e decision pa invita tur esnan cu for di 1 di november 2009 te cu fin di juni 2010 ta celebra entre 25 cu 40 aña den servicio di Gobierno y cu a baha cu pension, y dunanan un reconocemento pa nan labor cu nan a bin ta haciendo of a haci den Gobierno.
Intencion ta pa cada 6 luna duna reconocemento na empleadonan cu sea ta cumpli aniversario den Gobierno of a baha cu pension.
Milva Evertsz, empleado publico laborando na Directie Luchtvaart tabata un di esnan cu a wordo honra diabierna atardi dor di Minister Otmar Oduber, den cuadro di su servicio na comunidad durante 30 aña largo.
El a bisa cu durante 30 aña a conoce varios minister y awor cu Minister Otmar Oduber e ta masha contento cu e atencion cu e ta dunando e trahadornan. “E tabata haci falta”
Genoveva Koolman, kende recientemente a baha cu pension y cu a wordo honra tambe diabierna atardi dor di Minister Oduber. “E reconocemento aki a cay manera un sorpresa, pasobra nunca nan a elogia mi trabou. Mi ta hopi contento cu nan ta aprecia mi trabou pa promer biaha den 32 aña”.
Lilian Angela-Croes, empleado na Departamento di Labor y celebrando 25 aña di servicio a bisa cu e ta aprecia masha hopi loke Minister Otmar Oduber a haci pa e empleadonan publico, cu nunca el a spera algo asina.
Lucio Thijzen a briya e atardi ey mirando cu e tabata esun cu a celebra 40 aña den servicio di Gobierno y ainda e ta sigui traha, mustrando un determinacion grandi. E tambe a indica cu den 40 aña di servicio esaki ta e promer biaha cu el a wordo reconoci y e ta apreci’e masha hopi mes.
Mester bisa cu tur esnan presente tabatin e mesun comentarionan di gradicimento, nan tabata sinti nan mes valora pa promer biaha den tanto aña di servicio y tur tabatin comentarionan positivo den direccion di Minister Otmar Oduber.

ORANJESTAD – Gobierno di Aruba a tuma nota di e situacion na Peru caminda Joran van der Sloot ta wordo sospecha di ta involucra den e asesinato di e hoben Peruano di 21 aña Stephany Tatiana Flores Ramírez, yiu di un conocido empresario y coredor di auto na e pais Suramericano aki.
E homicidio aki ta hayando hopi atencion di prensa internacional, specialmente debi cu e sospechoso principal ta Joran van der Sloot, kende tabata e sospechoso principal den e desaparicion di e hoben Mericano Natalee Holloway 5 aña pasa.
Den e cuadro aki, Pais Aruba ta ricibiendo un serie di pregunta for di diferente medionan di comunicacion internacional y pa tal motibo ta informa cu pa por canaliza tur esakinan e entidad cu lo atende cu tur e preguntanan lo ta Ministerio Publico.